MC張天賦助理長文澄清非洪嘉豪介紹入華納 曾怒斥洪嘉豪粉絲應援係製造垃圾

MC張天賦助理長文澄清非洪嘉豪介紹入華納 曾怒斥洪嘉豪粉絲應援係製造垃圾
MC張天賦助理長文澄清非洪嘉豪介紹入華納 曾怒斥洪嘉豪粉絲應援係製造垃圾

張天賦(MC)與洪嘉豪呢對「賦豪CP」月初一連三場《Kaho x MC Frenemy Live 2022 演唱會》圓滿落幕,演唱會主題「FRENEMY」比喻二人亦敵亦友,為事業打拼。不過,有指演唱會期間MC助理兼Telegram粉絲群組管理員Yee Yee疑不滿洪嘉豪粉絲派應援螢光棒行為,仲喺Telegram怒斥洪嘉豪粉絲及大踩洪嘉豪啲歌,其言論惹網民關注。

Yee Yee先斥責洪嘉豪粉絲派螢光棒阻住睇騷視線:「真係唔好再有演唱會同場派嗰支咁嘅嘢,比(畀)幾毫子出嚟就做到好似好大應援真係好威威?阻住其他人睇,幫個地球製造垃圾,真係多得你唔少。賦二代(張天賦粉絲專稱)千祈唔好學。」又指MC啲歌太難,而洪嘉豪啲歌太悶,引起網民熱烈討論。

有網民反擊,認為MC之所以入到華納都係靠洪嘉豪;Yee Yee噚日(14日)就喺IG限時動態發長文,指需要澄清MC加入華納一事與洪嘉豪無關;佢表示MC與洪嘉豪2020年5月合作過一日MOOV男生們嘅項目後就無再聯絡,當時合作係因為MC當時剛獲得造星亞軍,而洪嘉豪剛推出新歌,各取所需,過程中未觸及華納管理層。

Yee Yee更指,MC與華納促成合作係源自於JUDE曾若華,當時華納搵咗MC擔任JUDE MV男主角,JUDE就建議與MC推出《十分錯》合唱版,就係咁令MC認識華納相關同事,Yee Yee更稱係由佢與華納高層討論與MC未來合作嘅可能性;又強調網絡上有關「MC靠洪嘉豪入華納」言論失實:「喺整個商談合作過程中,KAHO並沒有任何參與,亦不存在文字訪問中提及任何引薦、介紹等環節。」

有指Yee Yee於MC參加《造星II》時已替MC落力宣傳,又於MC比賽後無同任何公司簽約嘅真空期間自組公司協助拍攝、剪接Cover及YouTube片,所以深得MC信任。不過,有網民就搵返MC接受商台DJ謝茜嘉訪問內容,當時MC親述係由洪嘉豪介紹與華納高層接觸,並指對方有向佢透露華納係點樣做嘢;呢段內容就疑似將Yee Yee嘅澄清推翻。至於洪嘉豪接受媒體訪問時就表示唔回應事件,強調與MC一直都係好朋友,於音樂路上互相督促及成長。

MC張天賦tg粉絲群組管理員Yee Yee
MC張天賦tg粉絲群組管理員Yee Yee
MC張天賦tg粉絲群組管理員Yee Yee
MC張天賦tg粉絲群組管理員Yee Yee
MC張天賦tg粉絲群組管理員Yee Yee
MC張天賦tg粉絲群組管理員Yee Yee
MC張天賦與洪嘉豪
MC張天賦與洪嘉豪
MC張天賦與洪嘉豪
MC張天賦與洪嘉豪

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!