MIRROR年度排名︳第4位︰Jer柳應廷 好爆好高音 然後呢？

今年作品︰

單曲 － 狂人日記、砂之器、人類群星閃耀時、神奇之路、樂壇已死（客串參與）、《糾纏》（楊乃文合唱）、《明年見》（One Promise合唱）

樂壇指標唔止得幾個流行榜，學校歌唱比賽嘅參賽者選曲，都見證住聽眾口味。呢十年八年嘅歌唱比賽，如果無人唱張敬軒嘅歌，最大可能嗰度係女校。不過估計由今年起，會聽到唔少人唱阿Jer嘅歌。

多人揀某首歌參賽意味住咩？參加者認為首歌有難度，有人識，好聽，唱到就威。

上年「物語三部曲」串連死亡、彌留到轉生三個狀況，新人咁樣出歌係完全不按牌理出牌，但既然有MIRROR人氣保底，當然去到盡，亦都扑得中。今年嘅「重生三部曲」更過份，小克嘅歌詞真係一如花姐所講要查字典先明，但完全唔影響流行程度，一來多得MV加持，二來阿Jer嘅演繹令三首歌張力十足。已經有網民討論《狂人日記》係咪呢個年代嘅《浮誇》，我諗論難度，《狂》有過之而無不及。

係呀阿Jer啲歌好難唱好高音，亦都顯示出佢嘅弱點，就係演繹唔夠高音唔夠爆嘅歌會顯得拖泥帶水，例如《神奇之路》，又或者早前MIRROR六子音樂會唱林家謙嘅《聽風》咁。

而且過去2年6首個人主打歌都係王雙駿（音樂監製）＋小克（填詞），未免局限咗阿Jer嘅作品格局同種類。雖然已知同一班底為阿Jer下一首歌創造嘅風格會較為輕巧，但試想想阿Jer遇著《E先生連環不幸事件》呢類必爆歌，佢嘅人氣可能會更勝現在。

以出道3年嘅歌手計，有呢個水準同成績已經好難得，而且對作品有諗法亦說到做到，單係唱歌阿Jer都值得排第4！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！