MIRROR年度排名︳第8位︰Stanley邱士縉 演好大表哥

·2 分鐘文章

今年作品 —

劇集︰大叔的愛 / 第三佈局 塵沙惑

畢竟Viu嘅自家劇產量唔多,一眾MIRROR成員想向演員之路進發,都無辦法透過「劇接劇」嘅密集式演出磨練演技。整體嚟講,「鏡仔」當中有好演員,但唔多。大表哥係其中一位。

新人好容易出現「俾人知你做緊戲」嘅尷尬感(係令觀眾尷尬),Stanley勝在無呢種毛病,演得夠自然,但神似。《大叔的愛》成個地產公司辦公室入面,最似做地產嘅,一個係娟姐,另一個就係Stanley。台劇《塵沙惑》演香港僑生,嗰一臉書蟲先有嘅腼腆亦係加分位,仲要同劇係張榕容同劉冠廷呢批入圍金鐘獎級數嘅演員喎。

但係Stanley作為演員/主持,我睇過最出色嘅作品係……而家稱為「帶貨」嘅電視直銷節目《激安百貨》。個節目有時會先做個幾鐘頭網上直播,再接住同電視同步直播。差唔多2個鐘頭節目幾乎冇廣告冇休息,仲能夠保持主持能量,我睇見都攰。(另一位主持係Jace陳凱詠,一樣抵讚)

講返《大叔的愛》,Stanley嘅角色同戲份,就係要喺劇中多段漫畫化情愛關係以外,負責一條平衡呢種氛圍嘅感情線︰花心男愛上失婚婦(簡慕華飾演嘅Francesca)而引發嘅姊弟戀。難得Stanley演來花心時唔乞人憎,追姐姐時唔會立即扮「扮成熟」(我冇打多咗個字架)。睇花絮片段,結局時Stanley向簡慕華求婚成功,2個人居然冇錫錫,鏡頭外睇PLAYBACK連簡慕華都話Stanley「應該咀落去啦」,呢吓就係輸經驗嘞。

演技係一種「工多藝熟」嘅手藝,希望MIRROR嘅人氣可以為Stanley(以及其他有志演戲嘅ViuTV藝人)帶來更多鍛練機會。

不過Fans最鍾意睇嘅,梗係照顧姜B嘅大表哥,俾豬仔冷待嘅馬鞍山巨龍,同埋令大表嫂反眼嘅男朋友。但願Stanley可以繼續善良,始終過去呢個周末大家都見證到男人可以幾咁不堪……

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能