MIRROR年度排名︳第9位︰Lokman楊樂文 放低隊長包袱重新發光

Lokman楊樂文

今年作品︰

電影 - 狂舞派3

單曲 - 虎道門(與Anson Kong合唱)

主持 - 囝囝囡囡730

劇集 - 太平紋身店(客串)

Rap詞創作-WARRIOR 、BOSS 、ALL IN ONE、虎道門

Lokman楊樂文
Lokman楊樂文

開始主攻演戲嘅Lokman,表現都係四平八穩,可能有突破嘅劇集《IT狗》下年先出街。

至於上面數唔到Lokman嘅其中一樣工作,係擔任隊長,而且根據唔少訪問資料,Lokman唔止係負責訪問主力答問題就當完成隊長差事(例如以一口流利港普輕鬆帶過提問),而係會show前凝聚各人,或者同花姐討論(甚至拗)工作上嘅事宜。呢part,我唔係局內人,冇法知佢做得幾好。但由《調教你MIRROR》得知Lokman係因為呢個崗位而有壓力。

Lokman講過創作《虎道門》嘅時候,將已經熄咗嘅一團火重新點起。的確,Lokman喺《造星》時憑住豐富表演經驗,同埋比其他參加者成熟嘅態度而得到觀眾注意。但係前兩年,睇Lokman嘅演出,個人光芒係逐少逐少被比下去,可能就係未排解到隊長呢個名銜同責任帶來嘅壓力。

楊樂文(Lokman)
楊樂文(Lokman)

或者真係《調教你MIRROR》調教成功,今年見到Lokman唔止有返團火,仲有返表演者應有嘅閃亮。而佢同AK一齊打造嘅《虎道門》,論歌曲質素我認為係今年MIRROR成員音樂作品之中嘅三甲,當中有好大程度要歸功於Lokman嘅rap,同埋佢有份寫嘅詞。

我認為MIRROR終會有由團員負責曲詞嘅團隊作品面世,作曲我會揀Ian,填詞人一欄應該係Lokman。以佢隊長視角去寫團歌,會係十分有趣嘅作品。

仲有仲有,Lokman今年剪咗個非常啱數嘅短髮,邪邪地,正。

Lokman楊樂文
Lokman楊樂文

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!