MIRROR演唱會飛15分鐘賣晒 黃牛價炒上$8000 Fans集氣︰加場！開紅館！

本地男團MIRROR5月舉行成立兩周年演唱會 MIRROR "ONE & ALL LIVE" 2021，3場演唱門票今朝10點公開發售。呢次演唱會喺3千座位嘅STAR HALL舉行，但因為防疫限制只能有50％座位出售，以MIRROR現時人氣一定供不應求，果然今朝唔少fans都大呻買唔到飛！

MIRROR facebook專頁今朝有帖文提大家買飛，結果成為訴苦區﹐有fans話尋晚已經登入唔到網站，亦有人話今朝能夠成功登入，甚至可以揀位，但係去到付款階段，網頁就運作停頓，結果買唔到飛。根據留言，估計開售大約15分鐘之後，所有門票已經賣晒。

雖然MIRROR經理人花姐以及多位成員都呼籲歌迷唔好幫襯黃牛黨，但係已經有網上平台，出現炒價MIRROR演唱會飛。有人放售原價$1280嘅VIP門票兩張 ，開價$8500 ，炒高2倍以上。

買唔到飛嘅歌迷紛紛留言，集氣希望加場，認為以MIRROR嘅叫座力絕對可以開紅館，又或者搞網上直播，以杜絕黃牛黨炒飛。有人提議可以俾歌迷預繳票價金額，等主辦單位拎訂金去book場，咁就可以滿足fans需要。

另外， MIRROR今年第一首單曲WARRIOR今日派台，至於MV今晚八點就會喺網上平台公開。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！