MIRROR開拓海外市場 3.17推出英文單曲 網民反應不一

成軍四年嘅人氣男團MIRROR人氣一直居高不下，成功掀起香港久違嘅追星熱潮，成員們除咗歌影視工作不斷之外，廣告代言亦無處不在，行到邊都見到12子嘅蹤影，滲透力相當驚人。MIRROR上年開始獲公司MakerVille開拓海外市場，有部份成員已經先後前往美國或台灣拍戲和拍劇，原本更有機會全員出席日本音樂祭，不過因為紅館意外事件休團而取消。隨著MIRROR復出，開拓海外市場嘅計劃亦開始展開。有新加坡傳媒指MIRROR將於本月17日推出首支英文單曲《RUMOURS》。

《RUMOURS》嘅曲風跟過往嘅團歌唔同，內容主要講述喺初初追女仔嘅階段，身邊可能會出現各種謠言。MIRROR日前接受新加坡傳媒訪問，期間透露將推出首支英文單曲《RUMOURS》，並話希望可以憑呢首歌打進海外市場，令海外觀眾更加了解香港樂壇，及令廣東歌可以有更多人認識。另外MIRROR仲話第一次嘗試英文歌嘅心情既開心又興奮，不過英文歌嘅咬字及情緒都同錄廣東歌唔同，所以好彩邀請美國韓裔歌手兼創作人Andrew Choi作出一對一嘅指導。

消息傳出後，網民反應不一，有網民非常支持MIRROR推出英文歌，留言話「期待Mirror 第一首英文歌」、「終於有英文團歌 期待」、「Such an exciting news!!!! Super looking forward to it!!!!」、「MIRROR 12子加油 期待你哋新嘗試作品面世！」及「做得好 12仔係應該上國際大舞台嘅」等等。不過亦有網民唔太睇好佢哋，例如「中文都未讀得掂，仲唱英文！有時d嘢要量力而為」、「跳舞又唔齊，歌又hea唱，唔好玩啦」及「大佬舞都未跳齊，唔好咁啦不如lol」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！