MIRROR、MC張天賦於英國人眼中非男神級？街選靚仔結果杜汶澤撼贏Anson Lo

MIRROR、MC張天賦等都係近年男神代表，不過原來喺外國人眼中就唔係咁睇？相反仲認為某啲港人唔覺佢靚仔嘅藝人更靚仔？早前，移英港人阿盧和Heidi主理嘅YouTube頻道《是但啦》上載一條「英國人眼中嘅男神？」影片，於英國街頭訪問英國人對8位香港藝人嘅觀感，結果惹起熱議。

主持人將8名香港藝人分成4組，分別係：杜汶澤VS Anson Lo（盧瀚霆）、MC張天賦VS YouTube頻道「小薯茄」成員程人富、東方昇VS Edan（呂爵安），以及Jeffrey魏浚笙VS ViuTV導演Mike導（劉諾衡），畀路人睇每組人嘅相，再訪問對佢哋嘅觀感印象，作出2選1選擇。總括訪問結果，YouTuber阿盧和Heidi歸納出3點英國人喜愛嘅靚仔特質，包括留鬚、鬈毛及有紋身。

首先，主持人將杜汶澤和Anson Lo西裝造型照供受訪者選擇，唔少受訪者都即時選擇杜汶澤，覺得佢有「有錢人」嘅氣質，睇落有學識；雖然杜汶澤和Anson Lo年齡相差甚遠，又有受訪男士認為二人唔同風格難以比較，但杜汶澤最後以9票勝過Anson Lo 5票。而MC張天賦和程人富呢個對戰組合就由程人富10比3大比數勝出，主持人選用MC身穿粉紅色西裝褸嘅廣告照，及程人富一頭鬈毛對鏡頭燦笑嘅相作比較，大部分受訪者都覺得程人富笑容充滿親和力，鬈毛髮型相當可愛，相反MC就畀人感覺造作。

至於東方昇對Edan呢組，主持人選用東方昇留鬚照片及Edan與獎項嘅合照予受訪者比較，雖然有受訪者覺得Edan靚靚仔仔，一表人才；但東方昇嘅Chok樣同鬚根呢陣佬味就深得英國男女喜愛，東方昇以9票勝過Edan 3票，仲有受訪者表示東方昇似Johnny Depp。最後，Jeffrey與Mike導呢組就較有爭持，Jeffrey以9票對4票勝出；主持人將Jeffrey廣告照及Mike導赤裸上身大騷紋身和肌肉嘅相比較，有英國男士仲直言「好難揀」。而選擇Mike導嘅受訪者大部分都係因為Mike導嘅紋身而選擇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！