MIRROR主唱歐國盃港版主題曲 強尼ERROR第三聲道講波

【Now Sports】Now TV今日舉行歐國盃2020發佈會，除了全程直播51場比賽，同時請來男子組合MIRROR主唱香港版本主題曲，另外將由強尼夥拍ERROR等透過第三聲道以輕鬆方式為賽事評述。Now將全程直播今屆歐國盃51場賽事，陪大家見證最終王者誕生。Now今次特地請來人氣男子組合MIRROR擔任大使，主唱香港版本主題曲《The Beautiful Game》並為MV演出。MIRROR成員Alton表示：「足球本身唔係踢波嘅都識，都會留意嘅項目，我哋全部都會鍾意，就算唔識波都識個氣氛。」

電訊盈科媒體收費電視業務總裁蔡煒健表示：「相信今屆歐國盃最令人期待，我哋同球迷期待咗15個月，賽事終於開鑼。過去15個月我哋團隊唔敢怠慢，為賽事直播努力準備，為觀眾帶來Watch Party歐國盃『一齊睇』。除咗原有嘅專業評述，仲破天荒推出歐國盃第三聲道，畀觀眾有更多選擇。」

對於有份參與第三聲道評述，ERROR成員阿Dee表示：「今次我哋4個好期待，因為我哋4個可以亂蹹，有強尼大哥拉返我哋返嚟。」另一成員肥仔坦言：「公司搵得我哋4個一齊講波，絕對唔係要我哋正經咁講，大家緊張時我哋會講啲無聊嘢。」對於講波新拍搭ERROR，強尼表示：「今次會比過往輕鬆咗，因為平時大家太過悶悶哋，我諗我哋會做返同friend睇波嘅氣氛。」