MIRROR夏季新歌壓軸 姜濤X ERROR肥仔再現《造星》特務肥姜組合

MIRROR今個夏天大舉出動，唔止廣告拍戲出活動，歌唱本業都出盡力，7至8月每星期出一首新歌。官方社交平台就公布咗聽日（27號）推出嘅壓軸單曲，會係姜濤X ERROR肥仔（梁業）嘅《特務肥姜2.0》。

《特務肥姜》本來係3年前《全民造星》20強比賽其中一個表演環節，當時姜濤同肥仔以組成外表極大反差嘅組合跳唱蔡依林嘅《特務J》，成功喺2組對決中取勝，幫所屬嘅B組取得2個十強席位。姜濤同肥仔都係跳得之人，唔少觀眾都好鍾意呢個演出，甚至有牙膏品牌今年初搵「特務肥姜」重組拍廣告。

早前MIRROR公布「每周一新歌」計劃時，將各位有份出歌嘅成員／組合整成剪影俾fans估估下，其中一張一高一矮嘅，唔少人一睇就知係「特務肥姜」，而早前姜濤都有post同肥仔喺排舞室影嘅相，結果真係有佢地份！

姜濤成日都叫身兼排舞師同舞蹈導師嘅肥仔做「師傅」，而肥仔出post宣傳新歌都話「徒弟仔話太耐無出動有啲悶喎／所以又同佢出一出Mission囉」，噱頭十足！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！