MIRROR成員搜尋人氣榜︳盧瀚霆生日月變熱搜人物力壓姜濤

今年未完都已經可以講定呢句︰2021年係MIRROR嘅年份！無論係團隊定成員個人發展嘅成績都十分理想，出親活動都搞到萬人空巷，好犀利。

要量度個別成員人氣，除咗睇社交平台幾多人追蹤以外，YAHOO娛樂圈獨家披露各人喺YAHOO嘅搜尋次數排名！今次我地會分析5－7月嘅數據，當時有MIRROR演唱會、劇集《大叔的愛》、綜藝《調教你MIRROR》以及Anson Lo（盧瀚霆）生日打卡熱潮，絕對有參考價值。

Anson Lo 7月後勁凌厲爬頭做熱搜

芸芸數據中最突出嘅，係Anson Lo呢幾個月嘅人氣急升程度。喺5月教主仲係熱搜榜上第3位；到6月《大叔的愛》出街已經成為亞軍，去到7月「神徒」包下天星碼頭燈箱「賀壽」引發話題，教主一躍而上成為冠軍，甚至喺7月各成員搜尋總次數當中，近一半都係search Anson Lo！

姜濤Edan分佔第二三名

本來人氣王姜濤喺5、6月嘅搜尋次數仍然以大比數領先，但係7月Anson Lo嘅氣勢實在太勁，連姜B都要排第二。至於單飛後發展越來越好嘅Edan（呂爵安），只係6月時搜尋次數排名跌出三甲，5月同7月依然有唔少人search。

Ian Anson Kong兄弟拍住上

被fans稱為Ianson嘅2位MIRROR成員Ian（陳卓賢）及 Anson Kong（江㷸生），偶而喺搜尋次數排名打入三甲，好似Ian就喺6月自己生日月份成為熱搜季軍。整體嚟計Ian同AK喺MIRROR嘅YAHOO搜尋次數當中排第4及5名，當中以Ian較為佔先。

單飛真係有著數？

之前我地都統計過12位鏡仔嘅IG 追蹤人數，發現單飛嘅成員人氣的確佔先。喺搜尋數據嚟睇，「單飛有著數」呢個講法啱咗大半。頭先提到熱搜頭5位嘅成員都已經solo發展，剩返嘅阿Jer（柳應廷）喺搜尋次數嚟講，同其餘半隊仲未單飛嘅隊友相比，又唔算領先好多，而且排後段嘅7位成員，搜尋次數都相當接近。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！