MIRROR拆夥？ 姜濤霸氣護航：冇人可以𠝹開我哋

人氣男團MIRROR其中「6塊鏡」將於12月舉行2場音樂會，但他們講明會「錫身」，只得AK願意「蝕底」騷麒麟臂！對於有網民指組合猶如「拆夥」分成兩組人，姜濤Man爆表示：「冇人可以𠝹開我哋！」

姜濤、Edan、Jer、AK、Anson Lo及Ian昨日出席音樂會記者會，受訪時談及騷肌話題，他們不停拋波，大放笑彈！Ian在台上斬釘截鐵表示不會騷肌，隨即「卸膊」指Jer想露兩手，並表示：「我係玩音樂㗎！（上次你冇份騷，事後唔係嗌後悔？）講笑咋！過去嘅嘢就由佢！」

隊友觀眾席打氣

6人中只得近日有份拍內褲廣告的AK爽快答應騷肌：「我會同Anson Lo練定先，情況許可都可以騷吓手臂嘅！」豈料Anson Lo卻唱反調：「你講你自己咋！我最多騷手指！」Edan笑着作總結：「依家着衫係矜貴、特別啲！」姜濤深表認同：「Edan嘅觀點代表我嘅立場。（唔夠膽騷？）就算我夠膽，都怕嚇破大家個膽！」

講到今次開騷只得半數成員，另外6位兄弟會否呷醋、不快？AK表示不會，指其他成員屆時會現身做觀眾撐場，是他們最大的強心針及後盾。對於有網民指MIRROR現時猶如分拆成「紅啲」、「唔紅」兩組，AK明言：「我哋6個開到騷都係因為我哋係MIRROR！之前5月已經一齊開完騷。」問到被「𠝹開」兩組，可有不快？姜濤即搶答：「冇人可以𠝹開我哋！」AK再補充指12位成員一條心。

另外，有傳Edan及Anson Lo之後會孖影后毛舜筠開戲，Edan指未收到正式通知，再講到《i.SWIM》疑因遷就其檔期而停拍，他解釋是劇組想物色更靚的露天游泳池。