MIRROR有排撈 睇騷唔使急 姜濤驚鏡粉破財：我擔當唔起

人氣男團MIRROR將於紅館開騷，城中一票難求，門票更被炒高至44萬癲價一張。昨日成員姜濤出席活動時呼籲歌迷切勿買黃牛飛，揚言組合在歌壇很長時間，一定再開演唱會！

姜濤昨日以健康教育大使身份出席預防HPV活動，現場播出由他主演的宣傳微電影。他稱拍攝當日才發現微電影導演是熟人：「見到佢好驚訝，呢個成日喺維園同我打波嘅阿叔原來係導演，之後再同佢打波，我就禮讓咗好多，以前打波比較狠。（拍攝有咩難忘事？）我讀No Regrets（不後悔），讀咗十幾次都話發音唔啱。」

自爆小時候缺性教育

問到傳是處男的他是否也需要及早預防HPV，他表示已經接種疫苗，又指父母較保守，小時候沒有向他灌輸性教育：「記得細個問媽咪點解結婚會生小朋友，佢只係笑冇答我，細個唔覺得係因為身體接觸而有BB，以為結婚就有，原來唔結婚都可以有，但當然唔鼓勵。」

提到MIRROR演唱會門票被炒高到約44萬元一張，他聞言直指太誇張：「大家唔好買，我哋應該會喺呢行做好耐，之後會開好多次演唱會，大家唔好因為一場而損失咁多錢，我擔當唔起，我哋都想加場。（再加場，擔唔擔心體力？）都擔心，但因為係紅館，無論幾攰，熱情都可以蓋過。」他透露稍後會為備戰演唱會而閉關，問到有何秘密武器？他說：「自己個人演出未有頭緒，但團體表演就構思咗好多，會將啲歌重新編排。」此外，對有人批評12子為「12件嘢」，他大方說：「我哋未有資格去評論任何人對我哋嘅評論，希望提升實力，等更多人認同，係有進步空間。（話你哋係虛火？）會努力變為實火。」