MIRROR演唱會事故︳受傷舞者阿峯情況轉差 靠積蓄度日 李澤楷無接觸過

MIRROR演唱會發生嘅屏幕墮下事故，重傷嘅舞者阿Mo（李啟言）情況轉為穩定，早前阿Mo爸爸李盛林牧師嘅代禱文提到，阿Mo同父母講已經接受將要留院一段時間；演唱會主辦單位Makerville嘅母公司電盈主席李澤楷，宣布以個人名義提供1000萬作為阿Mo醫藥費，但李牧師亦以個人名義回應，表示謝卻好意，「因為在責任人未有妥善處理之前，所有捐贈都為時過早。」

另一位受傷舞者阿峯（張梓峯），幫佢代為發放消息嘅教育界KOL呂校長（呂詩慧）出post交代阿峯最新情況，指出「他今周的情況突然變差了，將會約見醫生了解。加上近日新聞令他壓力大增，希望傳媒朋友和網民諒解，多給空間」。

到尋晚，呂校長再次出post回應傳媒對阿峯情況嘅提問，表示「李澤楷先生並沒有跟阿峯及家人或本人溝通或見面過。阿峯在意外後的生活開支主要來自他的積蓄」。呂校長預告稍後會再解說阿峯情況。

上周五阿峯喺社交媒體發限時動態，罕有交代康復過程，相片背景似係進行治療嘅地方，阿峯寫道「做咗一堆密集式治療，身心都好攰，而且身體情況反反覆覆，每晚都好難瞓着，但我會嘗試努力面對」。

而呂校長亦有發文透露有同阿峯食飯見面，阿峯談到近況以及舞蹈表演行業生態。呂校長表示當時感到阿峯心情不佳，又有感而發地認為「我們的娛樂某程度上正建築在一些工種的痛苦上」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！