MIRROR演唱會意外.分析︳牽連廣泛 Makerville三大團復工無期 商台遭受波及 三大活動半天吊

MIRROR演唱會意外,令全城熱議嘅演出成為憾事。今年4月成立、由ViuTV分拆出來嘅Makerville,本來手執MIRROR、ERROR及COLLAR三大團,加上觀眾對ViuTV尚算受落,手執一幅好牌本應值得期待。但係首次主辦演唱會就出師不利,如日方中嘅MIRROR更首當其衝,相信事件牽連之廣,已經超乎想像。

首先,今次事故應該會進入司法程序,加上輿論壓力,Makerville應該會收埋旗下藝人,以免面對傳媒時嘅言論影響有關程序。MIRROR、ERROR及COLLAR三大團,甚至近年受歡迎嘅旗下藝人強尼(許博文)、Hailey(陳俞希)、沈殷怡(Shirley)等可能要避一避風頭。

而且演唱會主角MIRROR 12位成員相信需要一段時間去平復情緒,保守估計今年底先至會復工。原定8月前往日本出席SUMMER SONIC音樂節嘅行程恐怕難以成行,另外根據已公布嘅活動宣傳,9月初商台有三大活動都以MIRROR及其成員作為賣點,分別係明星籃球賽、Anson Lo x 鄭欣宜嘅「拉闊音樂會」以及Edan有份嘅Brand New Live生力軍音樂會。而呢幾個活動嘅門票並唔係俾錢買就有,好多都係同商戶合作,以消費指定金額或參加抽獎形式換取。假如MIRROR成員未能出席,主辦方商台相信要同贊助客戶有排拆。另外音樂平台KKBOX 9月亦會舉行「風雲榜」音樂會,同樣有MIRROR全隊以及個別成員單飛參與,但門票主要以月費組合形式出售,一旦觀眾要退票,比商台所遇處境稍為簡單,但係音樂會一半陣容都係「鏡仔」,演出內容恐怕要大改。

過去一年幾MIRROR成為廣告新寵,因為「鏡粉」樂意消費支持偶像。但意外發生後,唔少MIRROR代言嘅市場推廣計劃恐怕要hold住。而假如MIRROR要暫休,品牌就要再搵其他代言藝人,甚至要重新制定計劃,做marketing嘅朋友呢期一定好忙,就連搞活動、做設計、印刷嘅,相信都因為今次意外而受波及。

由於重傷嘅舞者阿Mo係COLLAR成員So Ching男友,COLLAR事發翌日已經取消工作,可見事件對今年出道嘅COLLAR同樣有嚴重打擊,而且好大機會So Ching需要缺席一段日子。已獲安排擔任女一嘅COLLAR成員Marf,劇集仍未知幾時可以開工,可能亦影響到公司對佢之後個人發展嘅部署。至於同樣《造星》出身嘅ERROR,由於向來賣幽默兼不拘小節,肯定要收埋。原本有傳11月 ERROR會喺九展開show,亦相信要無限期押後。

今次涉及演唱會舞台安全問題,下星期開show嘅Tyson Yoshi已經確定會改動舞台設計,而政府官員已經表明,會向接住MIRROR原有檔期嘅林家謙,以及9月初開3場個唱嘅周國賢,商討表演安排,減少危險裝置。估計主要會對演唱會舞台效果有影響,但2位歌手都係音樂行先,應該問題不大,唯一要擔心係林家謙嘅檔期會唔會受事件調查工作影響。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!