MIRROR演唱會意外｜Anson Lo及時托住Frankie免跌落2米深台底 多次伸手救隊友確保安全

MIRROR演唱會意外令舞蹈員李啟言（阿Mo）及阿峯嚴重受傷；早前阿峯被指輕傷出院，但原來非事實，其家人透過「夠薑子 呂校長 l 貓貓校監」FB 專頁交代傷勢，表示阿峯盆骨和腰部被壓傷，已轉院並繼續留醫；至於So Ching男朋友阿Mo仍留醫ICU，情況危殆。意外發生一刻，Anson Lo盧瀚霆與Edan呂爵安正於台上表演，Anson Lo事後被網民圍攻，指傷者被巨型LED熒幕砸中之時，Anson Lo仲繼續演唱。

Anson Lo與阿Mo嘅關係其實唔止合作夥伴， 更是大學時期相識至今逾10年嘅好友。二人一同參加《全民造星》 ，惟阿Mo 55強止步，但MIRROR出道後仍為其及Anson Lo個人演出伴舞，可謂「御用舞蹈員」，互相於追夢過程中扶持。是次意外發生後，不少演唱會業內人士、陳志雲、Eric Kwok及張繼聰等人都為Anson Lo解釋，認為戴上耳機好有可能無法聽到現場聲音，加上台上燈光照射下，未必睇到現場情況。另外，都有網民為Anson Lo繼續平反，指Anson Lo在4場演唱會上多次為隊友脫險。

1. 高空橋越過Lokman提醒Jer
MIRROR成員於演唱《IGNITED》時，Jer 柳應廷喺上升中嘅高空橋上興奮跳動；本身與Tiger邱傲然互動中嘅Anson Lo即越過Lokman楊樂文，走近並拍拍Jer膊頭，提醒佢小心安全。

2. 多次回頭關心Jer安全
Jer於演唱會上舞台邊位置面向觀眾演唱時，險差錯腳跌倒，Anson Lo即時想扶住佢，事後又多次回頭望望Jer 確認佢安全。

3. 升降台扶實Edan
Anson Lo及Edan演唱完之後以升降台離台，期間二人不斷向觀眾揮手講再見，不過差唔多到機關位置時，Anson Lo為免發生意外，伸手從後扶實Edan，並示意佢小心。

4. 疑台下托住Frankie
Frankie陳瑞輝喺演唱會演講時唔小心踏空跌落台，事後佢於IG報平安，指自己太興奮，只係輕微擦傷。但原來Frankie跌落地嘅位置旁邊有個三角形大洞機關；從影片見到，Frankie當時已經半身落入大窿之中，幸好有人於台底將Frankie推返上台。據網民嘅影片，出手之人應該係Anson Lo同Edan，事關Frankie講完嘢後，MIRROR 成員會從三角形升降台升上台演唱《無盡》，網民根據歌衫圖案分析，相信就係Anson Lo同Edan及時出手，否則Jer就會跌落2米深台底。

5. 保障舞蹈員安全
Anson Lo演唱《King Kong》本應有個需要舞蹈員們抬起，再借力踢腳嘅動作，但由於舞台狹窄不平，機關又出現問題，Anson Lo最後放棄以上舞步，改為用手做動作。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！