MIRROR演唱會發生嚴重事故 魯庭暉鞠躬致歉 網民鬧爆:夢想不是用人命去換取架

MIRROR
MIRROR

男團MIRROR噚晚舉行第4場紅館演唱會,期間發生嚴重意外,台中央其中一部大型屏幕突然掉下,壓傷兩名舞蹈員,二人隨即送往醫院救治,其中一人係女團COLLAR成員So Ching男友李啟言(阿Mo)。據悉阿Mo雖然清醒可說話,但頭部及頸部重創,有腦出血及頸椎第四節爆裂骨折,情況嚴重,現正在深切治療部(ICU)留醫。今日(29日)凌晨,MakerVille行政總裁魯庭暉趕抵醫院了解傷者情況,並喺醫院外鞠躬致歉。魯庭暉話會盡佢哋全力幫傷者家人同傷者,會非常認真處理事件,及承諾會徹底找出事故原因。

事故發生後,唔少網民去到魯庭暉及花姐IG留言鬧爆,例如「魯生花姐要出嚟道歉啦, 搵埋啲唔知咩工程公司做今次演唱會,依家真係出大件事啦,希望傷者無事」、「魯生,害死人啦,你要賺幾錢先夠,妄顧安全」、「公司究竟要賺幾多錢?平時已經搾乾搾淨,今次收咁多錢,要幾無良知幾無人性先可以做d咁嘅豆腐渣工程?從一開始已經唔係意外,係人為!!任何一個人受傷都不能接受!!」、「食盡人血饅頭既公司」、「夢想不是用人命去換取架」、「賺到盡仲要慳埋呢d錢,搵唔係行內專做紅館工程公司,搵間唔知咩工程公司,搞到成個台甩皮甩骨⋯⋯成個台成30幾個機關,show前2日會先俾佢哋踩台,真係痴X線公司喎!」、「錢你就識賺 但無乜品囉 咁大件事都潛」、「我覺得你應該比個交代所有人」、「收皮啦人命嚟架 X你 冇人會原諒你哋」、「​​乜X嘢公司可以差到咁?.幾乎場場都有意外根本就唔應該再繼續啦」、「點解可以咁流….」、「接受唔到!點解會發生呢啲意外?對你哋公司十分失望!」、「離晒譜!罔顧表演者安全!貴司請尊重每一位表演者!」、「希望花姐幫下dancers, 佢哋都係人, 點解會出事, 真係要為佢哋討回公道, 今次係無可能會發生既意外……」、「​​好嬲,點解個場咁危險」、「有冇搞錯啊?垃圾stage 整親人啦而家」、「垃圾ViuTV、垃圾花姐,食屎啦!如果今次出人命,你哋班膠層小心啲啦!」、「可否解釋吓點解個大電視會跌落嚟,仲要壓到人,諗住點兜?」、「垃圾公司,對唔對得住個dancer 父母呀?」、「你有冇搞錯第三日先坐panel仲要可以俾今日既意外發生」、「唔可以話唔關你事,你一定需要負責!!!!!!」及「花姐,人命黎架,錢唔係咁搵架。連最基本安全都未做好,個show 幾好睇都無用。永遠都係等出事先補穫。麻煩請調查清楚問題所在,否則你成世都唔會安落。」等等。

同時,亦有唔少網民叫花姐頂住,留言話「花姐你要頂住呀 啲仔都要頂住 依家最重要係互相support 如果情緒有咩唔妥 一定要搵人幫手」、「花姐,有咩事揾人分擔,有咩事唔好一個人孭上身,跟本唔關你事。去放個假休息下。支持你」、「花姐要加油,鏡粉撐住你」、「花姐撐住 為你們祈禱」及「加油花姐, 照顧好自己先有能力照顧好其他人」等等。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能