MIRROR隊長楊樂文Lokman 67歲爸爸楊志英代表港隊參加跆拳道世錦賽

MIRROR隊長楊樂文Lokman除咗跳舞叻，原來仲係跆拳道黑帶。Lokman曾經透露佢爸爸係跆拳道教練，自己因而接觸呢項運動。而Lokman爸爸楊志英（楊Sir）將以香港跆拳道代表隊成員，參加今個星期六喺紅館展開嘅跆拳道品勢世錦賽65歲以上組別賽事。

楊志英參加嘅品勢跆拳道係以展示動作為主，唔需要同對手對打。楊志英雖然已經教跆拳道多年，但係出賽前同樣要加操，而且由年初已經展開特訓。楊sir接觸跆拳道半世紀，受訪時提到一對仔女細個時曾經跟佢學跆拳道，Lokman由8歲開始學，目的係想個仔守紀律、做正確嘅事，而且可以強身健體。

楊Sir今年中已經為港隊喺品勢跆拳道亞錦賽奪得銀牌，能夠喺主場出戰令佢十分興奮，而且為同過去喺台下睇Lokman演出嘅身份對調感到十分有趣，楊Sir透露家人到時會去現場睇佢比賽。

唔少網民都睇過Lokman十幾歲時為TVB劇《天幕下的戀人》演黃宗澤跆拳道會嘅師弟，因為當年楊Sir工作嘅拳館正正係《天》劇嘅顧問，Lokman因此有機會初登幕前。今年初喺MIRROR演唱會舞台上，Lokman曾經感謝家人，提到爸爸都有自己夢想，所以好明白Lokman做緊乜。兩父子各有夢想但都會互相理解同支持，相當難得。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！