MIRROR 3週年|12子歌迷會聯合製一連串應援計劃 Jeremy歌迷安排「暗黑豬仔號」電車應援
今日(3日)為MIRROR 3週年日子,紀念3週年嘅新歌《ALL IN ONE》於中午12時喺《叱咤樂壇》首播,而MV就會喺下午1時首播,MIRROR總動員亦會喺九展舉行《MIRROR BE 3 BIRTHDAY PARTY》,準備驚喜俾一眾鏡粉。鏡粉過往嘅大手筆應援計劃都會掀起話題,12位成員粉絲應援會呢次就為MIRROR成軍3周年籌備一連串嘅「MIRROR三週年12FC(Fans Club)聯合應援」活動。
應援活動地點遍佈港九新界,例如喺旺角彌敦道設「L形廣告牌」、推出「應援宣傳車」一連共9日行駛至港九新界,今日(3日)停泊喺九展門外供打卡、又推出「MIRROR BE3緣份轉轉轉」IG Filter、銅鑼灣勿地臣街設有大電視團體應援宣傳片,今日仲喺九展設3周年Backdrop以及指定時間派發紀念手幅。
即睇【MIRROR成軍三週年專題】,重溫MIRROR精彩時刻及最新動態!
另外,MIRROR成員嘅獨立粉絲專頁亦都有為偶像應援,好似李駿傑(Jeremy Lee)獨立粉絲專頁Ninetales.Jeremy就買下九巴1A路線全包車身廣告,成為「星夜號」MIRROR專車,巴士廣告以「夜越暗、星越亮」為設計主題,兩邊車身車尾用咗MIRROR演唱會及團歌全隊合照,又加上12子喺《調教你MIRROR》講過對團隊嘅感言,感謝MIRROR喺3年前香港樂壇陷入低潮時仍勇敢追夢,巴士會喺10 月28日至12月22日一連8星期行走尖沙咀碼頭至秀茂坪路段。
除咗巴士之外,Jeremy歌迷會Jeremy Lee Fans Club都特意安排電車應援,名為「暗黑豬仔號」,「暗黑豬仔號」沿用153號碼電車,已喺10月27日啟程,將會去到11月17日,共3星期祝賀Jeremy。歌迷會分享「暗黑豬仔號」名字由來,解釋指Jeremy話叫「暗黑號」,Unicorn話「豬仔/黑豚號」,所以就溝埋嚟用:「三年來的一個個舞台,如同鋪陳著一節節的路軌,開闢出一條從來無人走過的道路,電車緩緩地帶同成長的歷史駛過,不論路軌往何方伸延,只要是Jeremy和Unicorn結伴前行,腳下的軌道總會指引我們往新世紀進發。」而江𤒹生(Anson Kong)與邱傲然(Tiger)歌迷會都分別話會有打卡位祝賀Anson Kong同Tiger出道3年,一班鏡粉為求MIRROR開心,出手認真闊綽。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!