MIRROR IG小編串爆回應鏡粉釀「關公災難」 驚動花姐代為道歉：係我嘅責任

女團COLLAR於1月12日正式發佈單曲《Call My Name!》出道，官方IG當日已有齊8位成員靚相，令一班鏡粉覺得同MIRROR官方IG經營方式好大對比，有鏡粉就開設IG帳號「viu_pls_do_ur_job」列出訴求，希望ViuTV同埋MIRROR小編可認真經營MIRROR官方IG，仲tag埋花姐，花姐最終喺IG限時動態表示已經收到其不滿：「我會努力做好、希望你開嘅ig acc可以follow mirror嘅ig，多謝」。

經花姐回覆後，MIRROR官方IG喺限時動態表示接納意見並改善，而小編的確變得積極，不時發佈限時動態，仲留言回覆一班鏡粉：「之前#it狗唔夠人所以小編去咗拍劇，原來大家咁掛住我。」鏡粉們就表示感動，指遲到好過無到。但情況突然急轉直下，IG帳號「viu_pls_do_ur_job」喺噚晚（17日）發表帖文，寫道：「原來做人真係可以無PR」，並公開有鏡粉被MIRROR小編不友善對待。

事緣係噚日（17日）MIRROR 4位成員姜濤、陳卓賢（Ian）、呂爵安（Edan）、邱士縉（Stanley）出席劇集《季前賽》記者會，MIRROR官方IG發佈限時動態，但只係叫大家「睇FB LIVE啦」、「#季前賽訪問 大家自己留意報導」，令鏡粉覺得呢位小編毫無誠意，就DM對方指：「有需要咁X嗎？好掛住舊年嗰位summer intern」，MIRROR小編好快就回覆鏡粉DM，但態度就唔多友善，表示自己唔知X字點解，又指唔知對方提及嘅summer intern係邊位：「建議如果中意睇舊嘅資訊，你記得cap低佢隨時回味」；鏡粉隨即表示MIRROR每位成員都好努力，唔希望MIRROR小編「做臭」佢哋，又建議MIRROR小編用心做好本分。

結果，MIRROR小編連環炮轟鏡粉：「我們的IG運作，大家有心了。這個世界你想見到的，同真正可以見到的，似乎你都未明白。」；又指MIRROR出席記者會已是對外界發佈資訊，反指再將資訊重複發佈至IG係多餘：「如果你只想在這個page睇到有資訊，那我可以和公司反映一下，MIRROR不用出席活動了，只要在IG發佈，那應該合你心意。」、「報導後又想我們把原原本本的報導再報導一次？這就是最合你心意？」、「你們的訴求又想見他們出活動，又想要報導，又要他們休息，但又不想他們完全消失，又要他們多時間練習排舞，我們都想跟著大家的所需去做呢。」

一班鏡粉得悉事件詳情後，紛紛留言直斥MIRROR小編態度惡劣，又指對方唔想做不如索性辭職：「別說是官方IG，普通人這樣已是沒禮貌了，掛住MIRROR we are個名，就代表了MIRROR，代表了Viu 」、「想知admin係咪無收足糧？」、「呢個職位，呢種語氣，呢啲用詞，真係合適？」、「原來可以咁樣做social media admin？真係要頒個獎俾佢先得」等等。事件亦驚動花姐隨即喺IG代該名小編道歉：「小編其實係好想做得更加好，以後會注意多啲表達方式。雖然係咁，佢嘅回應都係唔恰當。小編嘅錯，都係我嘅責任。我代佢同大家道歉。我地會再做好啲歌同IG，令大家可以更了解MIRROR。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！