日前被指攬女搭小輪 許方輝據報以家庭理由辭職

許方輝
許方輝

早前捲入緋聞風波的有線新聞及公共事務副總經理許方輝,據報道指許已經向有線以家庭原因請辭,而許方輝上司、有線新聞及資訊總監關慧玲今早向新聞部各組主管交代情況。

許方輝緋聞風波源於日前網路瘋傳嘅一張相,有網友話相中人疑似係許方輝,指佢返工時間日光日白喺天星小輪上攬女。但據知,關慧玲向同事澄清事件同網上講法有出入。由於照片只係影到側面,亦睇唔到女方容貌,未能確認相中女子係邊個,亦未能證實係咪有人上班時間擅離職守。

2013年有周刊影到,許方輝同比佢後生18年嘅TVB新聞之花周嘉儀喺車上舉止親暱。事後二人當然被迫暫時離開幕前,許方輝太太、前主播陳佩琳亦都搬離寓所冷靜一下。更爆嘅係緋聞見光之後一年幾,有傳第三者仍未死心,向許方輝同陳佩琳作出電話滋擾。後來許方輝同周嘉儀先後離開TVB,周更由新聞界轉投金融界發展。

許方輝2020年連同其他3名資深新聞人李臻、謝燕娜同陳興昌齊齊空降有線新聞部,當時內部人員已經預計將有大事發生。咁啱咁橋,呢4位高層都曾經係主播,但係有報導引述資深有線新聞部員工話「佢地4個連做實習都未夠班」。結果同年年尾,有線新聞部大裁員,40名員工被解僱,專題節目《新聞刺針》更遭「團滅」全組炒魷,事件引發其他編採人員辭職,《有線中國組》全組上下一齊遞信,多名中高層人員亦齊齊走人,可算係香港電視新聞界有史以來最大型嘅裁員/辭職事件。

去年底,有線任命周刊社長關慧玲為新聞及資訊總監,坐正同許方輝一齊過檔嘅「四人幫」頭上。不過「四人幫」有得留低,但李臻早前透露將會調職,據指許方輝都會轉位。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!