林夏薇中伏 導演追13萬報警

東方日報
·3 分鐘文章
林夏薇坦言不認識Simon,當時一心想幫人,才借錢給對方。
林夏薇坦言不認識Simon,當時一心想幫人,才借錢給對方。

無綫疑出現「騙徒」,不少台前幕後工作人員均被走數!人稱「Simon」的前TVBI經理雖然被炒數年,但經常問前同事借錢,更專向有錢女藝人埋手,曾被借錢的包括林夏薇、莊思明及陳敏之等,當中林夏薇一時心軟,借了3,000元給對方;至於導演Eddie前後共借出13萬給Simon,前日已報警求助!

昨日無綫導演Eddie於社交網大爆,指人稱「Simon」的前TVBI經理自2009年開始,至今向他共借了13萬而未有償還,前晚他已到警署報案,更呼籲眾「受害人」盡快報警。不少圈中人均留言,聲稱曾被對方借錢,其中孫慧雪戥Eddie可憐:「好嬲呀!成十幾萬,希望你追得番!」亦有攝影師留言:「我幾千蚊都爭成差唔多10年……我有個朋友都畀佢借咗5皮。」

以不同藉口借錢

Simon於無綫任職多年,主要處理海外事務,包括藝人外地宣傳及登台,平時多在電視城Canteen打躉,認識不少藝人,有指專向有錢女星埋手,貪其心軟,以漁翁撒網式向台前幕後借錢,少則幾千,多則幾萬,每次借錢藉口都會切合目標而各有不同,包括家人有病、愛犬有病、屋企有事周轉不靈等。除了Eddie外,據知他曾向林夏薇、陳敏之、莊思明、唐詩詠、黃祥興等借錢,認為他們有頭有面,不會追數。

林夏薇昨日受訪時坦言,去年10月Simon曾傳短訊問她借3,000元,指對方知道她是愛狗之人,即表示自己跟愛犬都有事,雖然林夏薇不認識他,亦從未聯絡,但心軟之下最終叫秘書過數給對方。不足1小時,對方再問她借多2,000元,合共5,000元,當時她才覺得有可疑:「其實我同佢從來冇聯絡、唔熟,只係平時喺公司見到點吓頭。當時佢借幾千,佢話要醫藥費、隻狗有事,講到咁困難,我咪借畀佢,跟住佢再問我借2,000蚊,我就冇再借喇!」並指對方至今仍未還錢。

莊思明執番身彩

眾所周知有家底的莊思明亦坦言Simon曾向她借錢:「幾萬蚊,佢話屋企發生咗啲事,我當時唔係唔想借,而係咁啱我攞咗啲錢去投資,冇太多流動資金,所以冇問佢借嚟做乜。」黃祥興表示:「佢搵過我,傳過短訊畀我,我正想覆佢時,佢就Delete咗,所以冇再搵佢。可能佢最終發覺唔應該搵我啦!(你諗住借畀佢?)少少哋我都諗住借。(佢借幾多?)佢話好困難,但冇講幾多。」

至於導演Eddie受訪時表示2009年於TVBI任職office boy,當時心軟,竟為他向財務公司借錢,結果自己欠下一身債,因此被家人埋怨,要做幾份工才還清。問到為何事隔多年後才公開此事?他表示:「曾經喺無綫canteen見過佢,但佢無賴拖數,仲話中咗六合彩會還錢。」日前他於社交平台見Simon自稱WhatsApp被入侵,覺得有人年近歲晚又出來「搵食」,擔心再有無辜者上當,故公開對方惡行。另外,警察公共關係科回覆,警方於1月15日接獲報案,報案人指早前向人借出款項後,借款人未有履行承諾還款。警方經初步調查,未有發現事件涉及刑事成分。

導演Eddie於社交網公開事件,並叫所有「受害人」報警求助。
導演Eddie於社交網公開事件,並叫所有「受害人」報警求助。