民選香港艾美獎結果公佈 港視贏晒!

每年年尾無綫嘅《萬千星輝頒獎典禮》都係大家其中一個好關心嘅討論話題,但係呢個頒獎典禮只係會頒返俾自己人,香港電視啲劇集同演員就算有幾hit有幾好戲都無份。雖然呢幾年嘅視帝視后同埋最佳劇集更加有觀眾票選,但觀眾投票只係佔一部份,而另一部分就有專業投票,專業投票有小圈子選舉嘅嫌疑,未能做到所有獎項100%民選選出。有見及此,高登巴打們最近搞咗個「2014-15年度香港艾美獎」俾一眾網民100%投票選出14-15年間心目中嘅最佳劇集視帝視后同埋最佳男女配角,嗱嗱嗱!呢個投票唔止無綫,連香港電視嘅劇集同演員都有得投㗎,今日仲公佈民選結果。


最佳劇集最後五強

 - 《警界線》

 - 《選戰》

 - 《來生不做香港人》

 - 《導火新聞線》

 - 《大眾情性》

結果由被網民封為神劇嘅《導火新聞線》大熱奪得最佳劇集,劇情緊湊又貼近香港

時事,網民當然like爆啦,不過無綫嘅劇集全部被out。



最佳男主角最後五強

 - 廖啟智 (杜一飛) - 《警界線》

 - 廖啟智 (宋漫山) - 《選戰》

 - 王宗堯 (張癸龍) - 《選戰》

 - 潘燦良 (歐陽山) - 《來生不做香港人》

 - 王宗堯 (樂嘉輝) - 《導火新聞線》

結果由廖啟智憑《選戰》飾演宋漫山成為民選視帝,男神王宗堯喺五強中佔兩個位,屬於賽前大熱,可惜不敵演戲經驗豐富嘅智叔。


最佳女主角最後五強

 - 李心潔 (葉晴) - 《選戰》

 - 張可頤 (梁美行) - 《來生不做香港人》

 - 周家怡 (方凝) - 《導火新聞線》

 - 梁小冰 (汪海藍) - 《導火新聞線》

 - 蔣祖曼 (谷采怡) - 《大眾情性》

結果由周家怡憑《導火新聞線》飾演方凝成為民選視后,入行近二十年嘅周家怡,喺無綫一直未有機會俾佢發揮,而家終於憑《導火新聞線》飾演女記者方凝而爆紅,唔少網民都覺得佢實至名歸。


最佳男配角最後五強

 - 蔣志光 (高音) -《 老表,你好Hea!》

 - 林嘉華 (張軍) - 《警界線》

 - 郭鋒 (何松柏) - 《選戰》

 - 曾偉權 (張國祥) - 《來生不做香港人》

 - 陸駿光 (吳曉旭) - 《大眾情性》

上年蔣志光憑《 老表,你好Hea!》飾演高音喺《萬千星輝頒獎典禮》中大熱奪得最佳男配角,今次「2014-15年度香港艾美獎」佢係無綫唯一一個入圍名單。可惜未能再次憑《 老表,你好Hea!》奪最佳男配角,結果由喺13年港視不獲發牌嘅政總集會中扮半澤直樹一夜成名嘅陸駿光憑《大眾情性》飾演吳曉旭奪得,唔少網民都覺得佢喺戲中好型同埋做得好好。


最佳女配角最後五強

 - 唐寧 (丁小海) - 《警界線》

 - 陳逸寧 (紀文慧) - 《選戰》

 -陳丹丹 (張丹楓) - 《來生不做香港人》

 -楊淇 (甄惠琳) - 《童話戀曲201314》

 -謝芷倫 (莫翠蓮) - 《大眾情性》

最佳女配角最有爭議性,因為陳丹丹未能憑《來生不做香港人》中飾演大奸角張丹楓奪得,唔少網民都戥佢唔抵,輸俾喺《警界線》中飾演丁小海嘅唐寧。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能