近排好多網民都討論緊一個『愛情故事』。故事講述一個貌似宅男嘅年輕人，喺條街度行行吓，迎面而來嘅靚女同佢擦身而過。呢個時候，背景響起經典嘅《陽光》廣告歌，佢繼續一路行一路回味頭先嘅一面之緣。點知突然，剛才嗰位靚女突然拍一拍佢膊頭，問佢借咗個電話打俾佢阿媽。宅男先生當然即刻答應啦，仲話：『我個密碼係個心形。』靚女就打電話，點知唔通，之後就還返部電話俾宅男先生。

宅男先生之後坐低，回味剛才嘅邂逅，仲拎部電話出嚟想索吓剛才位靚女嘅餘香。點知呢個時候，剛才個女仔突然又嚟問佢借電話，仲記得埋佢嘅密碼係個心形。呢位男士二話不說就即刻俾咗部電話個靚女。靚女電話打通後，就同男士講話電話收得唔好。宅男就叫佢行遠啲，點知個靚女拎住佢部電話越行越遠……結果，宅男一日之內冇咗愛情，同埋電話。

其實呢個『愛情故事』係出現喺5月9日播出嘅《警訊》。雖然佢嘅主題係想警戒大家要小心騙案，但係入面拍出宅男各種毒到爆嘅心態動作 （網民稱接近痴漢行為），簡直係淋漓盡致，所以引起咗好多網民嘅迴響，連個靚女都俾人起埋底。

其實個故仔仲有下文架！宅男先生唔見咗部電話，就當然去買返部新電話啦！點知行行下又再撞到兩個男人，話佢打傷咗佢哋個朋友，要求宅男俾部電話佢哋影佢相，等佢哋喺醫院個朋友認人咁話。佢仲叫宅男企返係原位唔好走添。就係咁，宅男連續唔見咗兩部電話啦！

喂，點解港台《警訊》都好笑過《今晚睇你》架！

LINK - https://www.youtube.com/watch?v=SoZh1MOAFd4