網民開PO「陳冠希、姜濤邊個靚仔啲」成熱討：全盛時期嘅希哥完勝

ViuTV皇牌選秀節目《全民造星》捧出男團MIRROR，係香港近年少有嘅偶像組合，出道兩年多人氣一直居高不下，成功掀起香港久違嘅追星熱潮。成員姜濤（姜B）除咗成為炙手可熱嘅廣告商新寵兒之外，新歌及演出機會不斷，成為近年嘅「人氣王」和「吸金王」。近日有網民喺連登開PO「陳冠希、姜濤邊個靚仔啲」，隨即引起巴打絲打熱烈討論。

此PO一出，大部分網民都認為全盛時期嘅陳冠希（Edison）完勝姜濤，並指出陳冠希素顏真面目已經好靚仔、光頭都贏姜濤及輪廓深邃等等，例如「都係希哥贏人地唔洗化妝gel頭都X打」、「兩個都唔化妝素顏，姜濤應該被人秒殺」、「Edc起碼素顏都仲好靚仔」、「姜b轉一轉髮型可能已經不行」、「全盛時期edc真係0死角」、「EDC神級輪廓」、「全盛時期嘅希哥完勝」、「先唔講咩髮型嗰啲 五官淨係個鼻 希哥已經贏晒」、「希哥好好多啦 姜b唔化妝應該冇得鬥」、「梗係希哥 試吓叫姜濤剪走d頭髮加埋唔化妝 即刻減一半」及「姜b真係唔夠揪喎」等等。

亦有唔少網民認為姜濤和陳冠希都係靚仔，不過佢哋係唔同level及屬於唔同類型，姜濤係韓系鄰家可愛類型；而陳冠希係壞男人嘅靚仔樣。總括而言網民都係認為陳冠希靚仔啲：「姜濤都靚仔 但同希哥就明顯唔係同一個level」、「兩種feel edc個樣好有攻擊性 姜b個樣好似好好恰」、「冇得比 姜濤係香港級嘅靚仔 希哥係亞洲級嘅靚仔」、「edc 個五官係靚仔好多既 但姜b個樣乖仔啲，鄰家啲」及「姜濤個樣太乖 希哥好D」等等。另外，亦有網民認為姜濤比較靚仔，留言力撐話：「姜濤世一」及「姜B靚仔啲」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！