Super Tiger盼正式出道 網民：冇實力憑個自信嘅組合

TVB去年推出女團After Class，不過都未站穩陣腳，日前又再將10位男藝人（羅天宇、許俊豪、丘梓謙、鄒兆霆、曾展望、林俊其、魏柏豪、劉展霆、李紹堅及宋懿芳）組成男團「Super Tiger」，並於賀歲節目《恭喜發財好運來》壓軸跳唱兩首歌曲。雖然佢哋咪嘴同埋舞步都唔齊，不過勝在襯晒紅黑造型，甚有隊型。節目出街後，唔少網民都將佢哋同ViuTV嘅MIRROR、ERROR同P1X3L比較。正當大家仲估緊Super Tiger係唔係「一騷男團」嘅時候，佢哋全員已經連續接受咗《TVB娛樂新聞台》同《東張西望》訪問，唔通TVB計劃將Super Tiger正式出道？

喺接受《TVB娛樂新聞台》及《東張西望》訪問時，佢哋不斷問大家「唔係唔俾機會我哋呀嘛？」。喺《TVB娛樂新聞台》中，佢哋就問到點樣面對網民評論，劉展霆就話任何事都有好同壞嘅意見，只係睇下用咩心態，同埋有幾想做好呢件事。林俊其就話好同壞對佢哋嚟講都係好事，都係成長嘅一部分，有唔好嘅評論即係等於佢哋有地方要改善。許俊豪就指自己好有經驗，亦覺得評論好好睇，當佢哋企喺網民嘅身份去睇，有啲地方做得唔夠好，有機會再展示嘅時候，可以比人睇到佢哋成長嘅一面。而「蔥頭」丘梓謙就話已經鬧咗一年，來來去去都係嗰啲，所以無咩太大感覺。另外，C位羅天宇出道年資最長，經常被成員們開玩笑，而羅天宇就表示唔介意，仲指住宋懿芳話佢只係出道兩個月。最後，Super Tiger成員們希望可以正式出道，宋懿芳話只要公司肯，佢哋就會樂意奉陪。

Super Tiger訪問出街後，雖然得到部分網民支持，不過大部份網民都似乎唔太支持，留言話：「冇樣冇實力憑個自信嘅組合？」、「一定要出道，TVB仲未蝕夠呀」、「笑死 好老土」、「無恥就無敵，好嘢！」、「super tiger唔知醜 ,仲話想同mirror鬥,慳啲啦」、「冇圈粉囉⋯⋯ 笑死」、「個隊名真係堅老土，造型唔掂，大灣味MK味濃​​」、「無論化妝, 衣著, 舞步都充滿"鄉土味"! 好啱大灣區觀眾!」及「跳到好奇怪…又跳得唔齊…..咁都出道？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！