兩個同一年出世嘅男女演員,30歲前得到一個機會,拍咗一套全球大賣嘅動作片《生死時速》(Speed)。拍戲嘅時候雙方互有好感,但愛情從未開始,結果友情反而開花結果,到而家各有所愛,奇洛李維斯同珊迪娜布洛仲係好朋友。
近年奇哥憑《殺神John Wick》系列人氣再上一層樓,工作當然排住隊。最新消息係年底上映嘅《超音鼠大電影》第3集入面,奇洛李維斯將會聲演超音鼠今集敵人Shadow,係由政府秘密培育而成,雖然同超音鼠係同類,但角色性格南轅北轍。