曾經歌影視三棲發展嘅鄧健泓,前年同太太石詠莉移居加拿大之後,不時喺IG分享新生活,舊年更開設youtube頻道同網民互動。前日(6日)鄧健泓50歲生日正式「入五」,Patrick喺生日前夕發相提到「移民加拿大令我多一天的青春」,因為港加之間有時差。照片所見鄧健泓眼尾魚尾紋顯現兼有眼袋,歲月痕跡纖毫畢現。早喺舊年生日Patrick都有「認老」,話見到出咗幾條白鬚,甚至出對比圖話「係老咗㗎喇」。