「美心妹妹」楊鎧凝(Celine)早前於社交平台出PO公開「理想boy」條件,又直言自己A0,身邊嘅人全部拍晒拖,不過都係覺得船到橋頭自然直。事後,Celine透露唔少朋友都WhatsApp話介紹男朋友畀佢,但就澄清之前招募男朋友只係講笑,又指自己將到日本九州升學。近日,已經開學嘅Celine就不時分享留學生活,著上日本高校校服非常青春可愛。
15歲「美心妹妹」楊鎧凝(Celine)因2013年拍攝美心廣告為人熟悉,其後更加踩入電視圈參與TVB《愛我請留言》、《陪著你走》等多套劇集拍攝。近年專注學業嘅Celine積極經營社交平台,與酒店和網店等合作試用產品以外,不時分享生活照及自拍照,昔日嘅小豆釘打扮充滿少女感,拍照時更加擺出多個可愛表情,變得亭亭玉立,唔少網民都表示睇住佢大。青春期嘅Celine最近於社交平台直言恨拍拖,更加公開擇偶條件。