Tiger邱傲然@MIRROR自嘲「下弦」獲激讚 直言欠缺機會：無作品你又點知我唔得？

男團MIRROR人氣爆登，早前演唱會售票更引起搶購潮；不過MIRROR成員其實一直被外界分成「上弦」及「下弦」。雖然花姐曾指MIRROR被分成上下弦係意料中事，但仍覺得唔好受，Lokman和Alton又曾公開表示介懷。相反，近日Tiger就大方自嘲「下弦」，獲花姐和唔少網民大讚。

Tiger日前受邀擔任第16屆鮮浪潮國際短片節頒獎禮頒獎嘉賓，於頒發最佳攝影獎時，不但親解上下弦定義，又以「下弦」介紹自己：「近排都好多人搵MIRROR拍戲，當然係好啦！佢哋好多時都係搵姜濤、Edan、Anson Lo、AK，搵阿Jer或者有時搵Lokman，但大多數都係搵上弦嘅人。咩係上弦呢？就係MIRROR十二個人，多啲人識嗰6個就係叫上弦，無咩人識嘅就係下弦，所以佢哋好少可搵佢哋拍戲，即係Tiger、Alton、Frankie嗰啲。有見及此，今日我嚟就係尋求工作機會！大家好，我係下弦嘅Tiger！」

對於下弦成員，Tiger認為每個人都有實力，只係欠缺表現自己嘅機會，令大眾覺得呢班人唔得：「無作品點會得呢？我無作品就無人睇，無人睇就無人氣、無人氣就無人知！咁我就諗：無作品睇到，即係無人睇到，咁你又點知我哋唔得呢？」Tiger補充指，凡事要盡力試，就好似自己早一日先收到邀請，得知要致辭更用心準備：「我要講嘢喎！想畀大家知道，我係sell唔講嘢嘅，但係機會來到就盡力試下。我入行幾年，學咗一樣嘢，就係無機會嘅時候就努力啲、有機會嘅時候就盡力啲。咁既然今日有機會，咁我就要盡力啲！」最後，Tiger不忘宣傳自己有份參演嘅ViuTV新劇《死角》，並指10月將播出：「睇完之後，大家再決定我哋得唔得都唔遲。」

Tiger嘅致辭被唔少網民狂讚有激勵人心作用：「專業的speech，以前畀錢去學都係學呢啲技巧，同觀眾有互動，有停頓思考位，又鋪排過，好激勵人心﹗sell唔講嘢嘅Tiger原來咁有腦仲咁識講嘢﹗」、「勁過Brian Cha多多聲」、「呢種自嘲式演講夠貼地好有說服力﹗」等等；又有網民表示Tiger其實好有潛質，做戲自然、跳舞又夠壓台。而花姐亦喺IG限時動態轉發Tiger嘅演講辭，並帖上三個大拇指讚好Emoij。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！