雅虎香港新聞 樓市贏家｜富豪all in 數千萬辣稅當碎銀（徐峰）
雖然政府近幾年先後推岀多項措施，企圖遏止樓價被炒得太過火熱，不過，真正的豪客，又怎會因為要多付15至30%而放棄入市，近日市場就有不少豪客付辣稅買樓，似乎十分睇好樓市。
美股、外匯、加密貨幣免費即時報價，自選投資組合獲取相關新聞提示。
早排就有報道指，一名中半山豪宅業主，就先後用兩億幾，買入一個位於粉嶺與上水之間的「豪宅新盤」十幾個單位，據講，這名買家所買的所有單位，都是以同一名義購買，都懶得搞甚麼甩名或買人頭等，全部單位一律要付15% 稅。
這都未夠豪氣，老實講，現今買新盤單位的買家，十居其九都要代理回佣，特別是那些價錢略高，而又賣了一段長時間，發展商採高佣策略方便代理回佣的樓盤，客人要求回佣的情況更甚。但聽聞，這位豪客分毫不需要代理回佣，而且過程極之爽手，每次都是去到售樓處填標書、付錢、走人，所以有關代理做完手續，便輕易上千幾二千萬數，實際落袋都有幾百萬，令不少行家們眼都紅了。
不過話時話，雖然這位豪客自己住中半山，但卻似乎鍾情新界豪宅，幾個月前就買了上水三幢洋房，連同上述的那個新盤，合共便花了3億幾4億元，還未計幾千萬的辣稅。但有留意開地產新聞的人都會發現，無論你包裝有幾豪華，新界豪宅保值能力一向較低，很多新界大型豪宅屋企，即使在樓市高峰期，都有大量蝕讓個案岀現，可能這才是這位豪客最豪的一點。
講到鍾意買樓，又怎能不提姓石那個麻雀館家族呢，他們買樓可謂非常無定向，由二手樓到新盤，由幾百萬的納米樓，到幾千萬的豪宅，以至過億的特色單位，全部通殺，不過似乎比較鍾情九龍區，例如上個月這個家族有人用大約480萬買了佐敦一個半新盤200幾呎開放式單位，又有人用了1億幾買了九龍塘一個複式單位，當然，全部都要付15%辣稅。
