TVB組10人男團Super Tiger撼MIRROR？成員包括羅天宇、天堂鳥許俊豪

TVB嚿年推出女團After Class，不過都未站穩陣腳，日前又再將10位男藝人組成男團「Super Tiger」，並於賀歲節目《恭喜發財好運來》壓軸跳唱兩首歌曲，未知真係期間限定，定係想藉呢次試市場反應用嚟對撼MIRROR？

Super Tiger喺節目中獻唱內地人氣選秀節目《青春有你》主題曲及賀年歌《喜氣洋洋》，兩首歌都係咪嘴同埋舞步都唔齊，不過勝在襯晒紅黑造型，甚有隊型，至於觀眾反應就一半正評一半負評，有部份網民表示成員感覺新鮮，欣賞TVB肯創新及畀機會新人：「得10日排舞已算不錯！TVB快點組團啦」、「這個表演是不錯的嘗試，覺得這班年輕人很有talent」、「睇到各人都好努力，投入表演。」等等；而部份網民就留言表示老土兼好笑：「多謝呢十個人為我嘅新年帶嚟歡樂」、「你不覺得尷尬，尷尬的就是別人。」、「可唔可以唔好咁7呀大佬」、「我覺得無記推呢班仔出黎比人笑」等等。Super Tiger表演時由有「女神收割機」之稱嘅羅天宇企正C位，帶領其餘9位成員跳唱歌曲，成員各有來頭，除咗上位小生仲有藝員訓練班新人，一齊睇睇有邊個啦！

1. 羅天宇
羅天宇可以話係10名成員中知名度最高嗰個，由於佢前度女友及傳親緋聞嘅對象都係女神級別，所以被譽為「女神收割機」，2008年參選《香港先生選舉》以少年組冠軍入行嘅佢喺早年《愛‧回家》飾演馬子仁令觀眾留下印象，近年喺《香港愛情故事》及新版《十月初五的月光》演技受到讚賞，今次企正C位可見備受TVB力捧。

2. 許俊豪
許俊豪其實係組合天堂鳥（BOP）成員之一，直至嚿年解散後簽約TVB向影視圈發展，早前喺《愛上我的衰神》入面飾演中學美術老師竇哲人，陰沉嘅笑容及兇狠眼神冧倒一班觀眾，唔少網民睇完呢次Super Tiger表演，大讚許俊豪跳得好，仲話希望天堂鳥再戰樂壇。

3. 丘梓謙
丘梓謙有多年跳舞老師經驗，又係童星出身。2014年加入TVB，不過無咩發展機會，直至嚿年被安排喺處境劇《愛‧回家之愛心速遞》扮演人氣偶像「蔥頭」受到關注。

4. 鄒兆霆
鄒兆霆係第29期TVB電視藝員訓練班出身，於《愛．回家之開心速遞》飾演富家子弟「賈明昇」為人熟悉，舊年曾與《東張西望》主持潘梓鋒傳因爭女而打架。

5. 劉展霆
劉展霆為香港霹靂舞舞者，2021年參加《盛•舞者》入行，節目中大騷肌肉及手臂紋身，近日熱播劇集《青春本我》亦有佢份，出演其中一名學生角色，仲同細10年嘅鍾柔美（Yumi）有唔少對手戲。

6. 李紹堅
李紹堅畢業於2019年第30期無綫電視藝員訓練班，與劉展霆一樣參加過《盛•舞者》同被安排出演《青春本我》。

7. 林俊其
林俊其身高183cm，樣貌及聲線都好似王浩信，又被安排三度喺劇集《兄弟》、《反黑路人甲》及《踩過界II》中飾演王浩信角色嘅年輕版及替身，令觀眾注意，被稱為「A貨王浩信」。

8. 曾展望
曾展望為《#後生仔傾吓偈》「後生仔」成員之一，近年被安排参與《Think Big》主持及劇集拍攝，喺《愛‧回家之開心速遞》中飾演接龍實習生，又喺《青春不要臉》中飾演龍哥哥，發展唔錯。

9. 魏柏豪
魏柏豪係一名前空少，憑《衝上雲霄大選》加入TVB，被安排主持綜藝節目《麻雀鬥室三決一》及《東張西望》，接棒黃穎君、林希靈和黃愷怡呢三位東張主持。

10. 宋懿芳
宋懿芳係應屆藝員訓練班畢業生,今次咁快獲得出鏡機會，擔任Super Tiger一員，唔通有望上位？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！