TVB史無前例 豪派2,000萬利是

無綫史無前例由今日年三十到大年初三，豪派2,000萬利是！總共逾40萬封利是等你攞，用手機隨時可攞走「一張金牛」過肥年，一眾藝人大表興奮，其中張秀文更讚電子利是夠方便：「喺屋企就有人畀錢我使！」

無綫昨日於將軍澳電視城隆重舉行《Fusion Bank富融銀行呈獻：睇電視 𢭃利是 融易過肥年》記者會，宣布今日年三十到大年初三（2月11至14日）向全港觀眾大派逾40萬封利是，總值超過2,000萬利是錢及電子現金券，最大封利是高達1,000元，認真重手。

昨日出席記者會藝人包括林盛斌（Bob）、張秀文、孫慧雪、鄧佩儀、蘇韻姿、林凱恩及應屆港姐等，現場由藝人介紹遊戲「 𢭃利是四部曲」包括「準備WeChat睇電視」、「抽利是」、「拆利是」和「收利是」，玩法簡單。高層余詠珊在台上說：「今次真係史無前例，未試過派咁多利是，希望大家開開心心過新年。」

Bob有筍盤益張秀文

Bob預算今年會派8至10萬元利是，亦因疫情會派電子利是給內地與澳門的朋友。秀文指電子利是環保又方便，笑說：「喺屋企就有人畀錢我使，幾得意。」未婚的她表示會派開工利是給工作人員，Bob即連番追問她何時結婚派利是，她笑說：「你話啦！你求我咪嫁囉！」Bob撮合朱慧敏嫁得名醫，問到可有「筍盤」介紹給秀文，他說：「我會做o架喇，希望佢出年派利是啦！」氹得秀文即說：「我一定去你屋企拜年，你記得留番啲筍盤畀我，哈哈！」當知道Bob沒有收媒人利是時，她即笑說：「如果結婚，我真係會跪低斟茶畀你，呢份心意我一定會畀你。」Bob聞言大笑並說：「大家聽住喇，係跪低斟茶。金融才俊啱唔啱？」秀文立即點頭「收貨」。

孫慧雪冇得避年

往年外遊避年的孫慧雪笑謂因疫情關係，今年避無可避，預計會派5位數字利是，她笑說：「已經包咗一半利是，但係唔夠，雖然面額唔多，但係數量多，冇得避要派番啦！」近期在節目中講到失散20年的媽媽，去年突然接獲母親早已離世消息，她說：「已經係上年嘅事，喺隔離期間收到消息，當時得我一個人，爸爸好擔心我，嗰陣心情好沉重，依家OK，唔想屋企人擔心，亦已經去拜祭過。」