【TVB山頭分佈2.0】李寶安退休 余詠珊辭職 曾志偉未夠半年成最大勢力

自從TVB年初宣布搵向來關係唔錯嘅曾志偉出任副總經理兼行政委員會特別顧問，負責綜藝及資訊娛樂節目，大台隨即風起雲湧。由於志偉負責嗰瓣，正正係另一高層余詠珊(Sandy）睇開嘅綜藝節目，當時已經行內熱傳Sandy坐唔穩。余詠珊早前被調職負責唔熟路嘅業務發展，唔使再處理綜藝節目，醒水嘅都知咩事。Sandy月初都向外界提過會辭職，而今日有傳佢會喺4月30日之後離開TVB。

高層勢力對藝人星途有舉足輕重影響，TVB一班同節目有關嘅高層，究竟管邊瓣咩title有咩牙齒印？早前TVB大股東黎瑞剛接受訪問時批評TVB有多項缺失，其中一瓣就係內部山頭林立。估唔到呢半年，各個山頭陣營又有所改變。

李寶安－董事局副主席兼集團行政總裁

現時係「TVB真一哥」嘅李寶安，盛傳會喺5月底股東大會上提出退休。以年紀計，李今年65歲，退休好合理，不過「新同事」曾志偉其實都68歲，難免會引起猜測。

會計師出身嘅李寶安，上世紀90年代本來喺麗新集團工作，後來加入麗新創辦人林百欣旗下嘅亞視而殺入電視圈。2007年轉投TVB，2010年因為前總經理陳志雲涉貪案而接替其職位，2015年再上一級成為CEO。有報導話年初曾志偉空降一事，連李寶安事前都唔知道，皆因係TVB新主席許濤親自欽點，保密工夫十足。

杜之克－副總經理（戲劇製作及節目）

電視台幕後出身，做過節目創作撰稿等崗位，曾經遊走於亞視、有線同商台，2016年加盟無線出任副總經理，現時主理TVB合拍劇。圈中人話TVB前任主席陳國強上任後，搵杜之克同余詠珊幫手平衡勢力。按銜頭杜之克同曾志偉同級，但係陳國強辭任、李寶安退休之後，杜生嘅權力怕且唔同晒。

曾志偉－副總經理（綜藝、音樂製作及節目）兼行政委員會特別顧問

曾志偉上任幾個月就多多動作，而且下下命中TVB近年流弊，包括綜藝節目越做越頹、音樂節目變成同系公司「星夢」嘅獨家村等。星夢話事人何哲圖喺曾志偉埋位冇耐率先遞信，志偉立即搵前TVB高層何麗全回巢掌管音樂事務，皆因何同圈中人關係好，近年做演唱會製作人更加同歌手、唱片界人士熟絡。據聞志偉就係想借何麗全人脈，搞掂三大唱片公司同TVB冰封嘅關係，而何亦不負所託，三大唱片歌手逐漸現身大show同《勁歌金曲》。一班星夢幫歌手冇晒優勢，立即向志偉賣口乖。

志偉另一大舉動就係搵「徒弟」王祖藍做「首席創意官」，再捉晒綜藝節目相關人等開會度橋，4月初隨即開記招力推9大綜藝節目，4月中旗艦製作《開心大綜藝》馬上登場，正面迎戰ViuTV嘅《最後一屆口罩小姐選舉決賽》及《Chill Club推介榜 年度推介20/21》，仲出口術明寸Viu只可以同J2相比。

一上馬即刻令高層大地震兼節目改革，曾志偉名義上唔係No.1，不過論影響力佢先係新一哥。

曾勵珍 － 助理總經理（戲劇製作）

杜之克主理合拍劇，咁珍姐就係負責管理TVB自家製劇集，連劇集監製都要睇珍姐頭，咁你明白點解藝員攞獎要講「多謝珍姐」。曾勵珍喺TVB超過40年，由PA做起，歷任邵逸夫同方逸華年代，一度因為樂易玲上位而失勢。志偉空降，名義上成為珍姐上司，不過珍姐絕對唔駛驚，因為曾志偉同曾勵珍原來係堂姊弟！

樂易玲－助理總經理（藝員管理及發展）

樂小姐負責管理藝人事務，同珍姐咁高咁大，難怪成日傳出工作上「互有火花」嘅消息。每年TVB藝人都會去樂小姐生日會，送禮仲夠晒大手筆添。樂易玲曾經係電視同電影幕後製作人，1993年結婚生仔之後退隱十年，2003年由方逸華力邀出山擔任藝員科助理總監，之後扶搖直上，唔使5年就升到做製作資源部總監，2016年7月升任現時位置。

有記者問樂易玲點睇曾志偉返TVB，佢就話好多同事都好開心，仲話另一同級高層余詠珊「有志偉呢個上司應該好高興」，聽落有另一層意思喎！

余詠珊－助理總經理（業務發展）

曾志偉空降TVB，職能涉及綜藝節目，位置仲係余詠珊(Sandy)之上，行內人直指係要一改余過去幾年嘅做法。創作過《今日睇真D》、一手創立有線娛樂新聞台嘅余詠珊，2011年重返TVB出任綜藝科總監，並受陳國強重用，與樂小姐同珍姐分庭抗禮成為「TVB三大巨頭」。

余詠珊上台後唔少做法惹來非議，例如將一批有線愛將如黃翠如、陸浩明、洪永城帶入TVB兼且俾大量演出機會；2013年港姐決賽改為錄影，據聞就此焫著志偉。最為人詬病係2013年TVB成立星夢娛樂負責音樂事宜，話事人正係余詠珊老公何哲圖（Herman)。自此TVB大部份劇集歌都係由星夢歌手包辦，由於同四大唱片公司仍未就版權傾掂數，每年「勁歌」頒獎禮變成「星夢春茗」，「一姐」菊梓喬更加連奪三屆最受歡迎女歌星。

志偉上任後，2月中TVB出通告宣布Herman 月底辭職走人，另外Sandy就會調任負責業務發展，講明係跟李寶安，而且唔再負責綜藝節目，用意好明顯。到4月初Sandy回應傳媒已經辭職，「余黨」山頭可謂正式剷除。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！