TVB影片頻道疑抄《ERROR自肥企画》 網民：抄到咁足知唔知醜

ViuTV綜藝節目《ERROR自肥企画》，自播出以來都深受觀眾喜愛，無論ERROR四子、《新世紀福音戰士》嘅主題曲、ERROR cosplay嘅造型及「無制限OT編集団」一班幕後工作人員都有媒體大篇幅報導。ViuTV做到有聲有色，無綫搵「獎門人」曾志偉同王祖藍返嚟坐陣，進行一連串改革後，都仍被網民狠批老土及唔夠貼地。

近日有網民發現影片頻道「女神channel」近日上傳咗張曦雯嘅片段寫住「自食可肥｜但很好味」，同《ERROR自肥企画》差唔多一模一樣；而呢個頻道亦係TVB旗下嘅頻道之一，TVB亦曾經喺官方Facebook幫手宣傳過。除咗構圖相似之外，兩邊都用咗黑底紅字，用嘅字眼都差唔多，由《ERROR自肥企画》嘅「極秘」、「無制限」；變咗女神channel嘅「極正」、「無預算」。仲要有張曦雯食嘢嘅畫面「有人話獨食難肥，但其實食得多就肥㗎啦，自己食好多嘢咪肥囉，咪自肥囉，不過好味咪得囉」。

就算張曦雯係唔少觀眾心目中嘅「完美女神」，有樣有身材，又識打機同下廚，但抄到咁足都引起網友不滿，紛紛留言：「肉酸到呢」、「大台喎」、「抄到咁足知唔知醜」、「知唔知咩叫創意？」、「零分重做！唔好咁肉酸抄襲啦～～～」、「好可悲 咁都要抄」及「咁都要抄？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！