TVB收視︳《失憶24小時》首周表現麻麻 《陀槍師姐2021》連跌4周

·8 分鐘文章

TVB最新公佈2月15-21日收視,期間只有一日農曆新年假期,收視應該重回軌道。嗰個星期新劇《失憶24小時》開播,結果首周收視有22.9點,算係勉強合格,起碼高出20點收視警戒線一啲水位。但係仲播緊嘅《陀槍師姐2021》第一周都有23.4點,而坊間對《失》嘅口碑平平,估計全劇收視都會維持呢個位置。

至於開頭係威係勢嘅《陀槍師姐2021》,每個星期嘅收視都會逐少逐少流失,最新收視係21.9點。《陀》同前幾輯最大關聯可能只係仲有滕麗名,但係阿滕要到尾聲先再現身,加上劇中人談情多過查案,恐怕隨後2星期收視都好大可能再向下。

收視王牌《愛•回家之開心速遞》假期過後表現反彈,周一至五總收視27.7點;《東張西望》亦都升返上24.1點。而星期六晚播內地主旋律電影《戰狼II》只有16.6點,收視比前一周《燕雲台》大結局跌6點,即流失差不多40萬觀眾。

流行經典50年
流行經典50年

曾志偉新上任成為TVB副總經理後,矢志要搞好音樂節目,但係做咗好幾年嘅《流行經典50年》連續2周得16點收視,相信「曾總」都留意到呢個情況。本來打理綜藝節目嘅高層余詠珊話,因為太多歌手排隊要上去《流行經典50年》宣傳,即使唔少觀眾反映某啲歌曲翻唱過n次,但係個節目想cut都難。唔知曾志偉會點處理呢個呈現老化嘅音樂節目呢?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

--------

2月8至14日TVB收視︰過年收視影響各異 《陀槍師姐2021》再微跌

TVB剛公布2月8至14日收視資料,當中3日(2月12-14日)係年初一至三,向來過年都係收視低潮期,一來觀眾出外拜年甚至出街食飯,二來新年假係外遊高峰期。今年新春仍然受疫情影響,食肆冇得夜市堂食,出國更加唔駛講,對收視會有咩影響?

先睇周一至五節目,2大收視穩定王牌《東張西望》同《愛.回家之開心速遞》分別下跌,後者更比上周跌1.5個收視點。嗰個星期開播嘅10點半綜藝節目《天天開運王》亦比前一檔嘅《煮場爭霸》稍遜,有18.4點。而賀年節目《金牛吉祥耀保良》就只有16.5點。

兩線劇方面,《陀槍師姐2021》第三周收視再微跌0.1點至22.3點,喺口碑平平情況下總算力保不失。而步入結局周嘅配音內地劇《燕雲台》,星期一至四收視再微升至23點,星期六一連2集結局篇有22.7點,比前一周升多過1點。《燕雲台》後段收視穩步上揚,整體表現梗係唔算突出,但係比起前一套配音劇《錦繡南歌》都叫及格了。

至於大年初三星期日,《東張西望》、《港產旅行團》及{香港原味道》呢類資訊娛樂節目表現企穩,反而《愛.回家之開心速遞》同《流行經典50年》錄得跌幅,後者直情流失2點收視(約13萬觀眾)。而下星期收視亮點當然係《失憶24小時》開播首周表現,觀眾對郭晉安演市井之徒反應唔錯,睇下可唔可以谷起收視。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

—————-

2月1至7日節目收視︰口碑影響《陀槍師姐2021》第二周收視跌 《燕雲台》近結局稍微反彈

今次公布嘅係TVB 2月1至7日嘅收視成績。前一周開播嘅《陀槍師姐2021》驚喜地錄得23.4點收視,但係唔少觀眾睇完頭幾集都話劇情「膠膠地」,而且同前4輯冇咩關連,究竟第二周收視能唔能夠維持呢?

果然第2周嘅《陀槍師姐2021》收視,比頭5集跌1點至22.4點,雖然比起前一檔嘅《堅離地愛堅離地》好,但係呢個跌勢好可能係稍後集數持續,要視乎觀眾有冇興趣睇陳豪同宣萱談情嘞。

另一套黃金時段劇集《燕雲台》步入尾聲,2月首周收視再微升至22.8點,周一至五表現比《陀槍師姐2021》更好,星期六嗰集甚至比前一周升1.6個收視點。下一周公布嘅結局篇收視成績,話唔定會有驚喜。

食飯時間2大皇牌《東張西望》同《愛回家之開心速遞》,前者全周保持23點左右水平,後者周一至五微升至27.2點,周六播出嘅1141集比前一周反彈近2點。

下星期TVB將會公布過年前及初一至三嘅收視資料,今年受疫情影響觀眾冇得外遊,會唔會令收視一反常態不跌反升,將會係下周收視報告重點。

————————————-

1月25至31日節目收視︰《陀槍師姐2021》收視有驚喜 頭5集更勝《踩過界2》

TVB公布1月25-31日收視表現,呢個星期焦點梗係開播嘅《陀槍師姐2021》啦。前4輯《陀槍師姐》成績彪炳,今輯故事線同角色截然不同,加上TVB臨時變陣,將套劇放喺年頭淡季推出,會唔會有影響?

結果頭5集《陀槍師姐2021》收視有23.4點,對比之前嘅系列梗係強差人意,但係近年TVB收視低迷,呢個表現已經算有驚喜。對比上一檔嘅倉底劇《堅離地愛堅離地》嘅20點邊緣固然有進步,就連上年台慶劇《踩過界2》首周收視都係得22.3點,《陀槍師姐2021》已經係安全過關。唯一隱憂係劇集風格同前作唔同,可能令觀眾棄劇,加上農曆年臨近,收視有好大機會下跌。

黃金時段另一線嘅配音劇《燕雲台》前周收視22.6點,同再上個星期差唔多。劇集步入中段,估計收視基本盤大概22點左右,去到過年期間可能貼近20點警戒線,不過睇落點都唔會差過《錦繡南歌》。

收視長勝將軍《愛回家之開心速遞》平日收視26.9點,比前一周跌少少。嗰個星期嘅周末冇大騷,新節目《港產旅行團》有Ben Sir同年青藝員四出搵食行山,收視有22.5點,表現比成本唔細嘅慈善show同頒獎禮更勝一籌,難怪TVB要搵「獎門人」曾志偉空降睇住綜藝節目。

-------------

1月18至24日節目收視︰《堅離地愛堅離地》結局收視回升挽救頹勢

【堅離地愛堅離地】結局收視回升,張振朗唔化妝帶眼鏡扮毒男嘅心血總算冇白費
【堅離地愛堅離地】結局收視回升,張振朗唔化妝帶眼鏡扮毒男嘅心血總算冇白費

TVB最新公布1月18至24日節目收視,嗰個禮拜比較值得留意係劇集《堅離地愛堅離地》結局周成績。年頭收視通常都係表現平平,拍好三年先出街嘅《堅離地》前三星期收視都係喺20-21點俳徊,僅僅算合格。去到第15-19集結局周,平均收視有20.8點,比上星期微跌。但係星期日播出嘅結局篇就埋個靚尾,錄得全劇最高嘅23.3點,以星期日黃金時段節目或者劇集結局嚟計算係唔差。

另一線劇集《燕雲台》該星期收視微升0.1點至22.8點,成績當然唔算突出,但係對比起上一套晚間配音內地劇《錦繡南歌》多次唔夠20點嘅情況嚟睇,《燕雲台》收視可以話係收貨。

《愛•回家之開心速遞》當然繼續係收視保證,星期一至五有27.4點,周末都超過25點。值得一提係星期日晚《東張西望》收視直逼《愛.回家》有25.6點,或者同封區措施嘅報導有關係。至於星期六晚嘅籌款show《慈善星輝仁濟夜》就有平均15.8點,居然勝過前一周嘅勁歌頒獎禮,都算出人意表。

宣萱陳豪主演嘅【陀槍師姐2021】能否延續收視佳績?
宣萱陳豪主演嘅【陀槍師姐2021】能否延續收視佳績?

下星期將會公布《陀槍師姐2021》第一周收視,雖然有前4輯嘅口碑,但係新一輯風格同人腳截然不同,估計收視未必比前一檔嘅《堅離地》出色好多。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能