TVB藝人惹官非事業凍過水？羅鈞滿冇晒影 楊明有位上 呢位視帝都衰過

TVB藝員、《東張西望》主持潘梓鋒據報因涉及打鬥事件而要停工，唔止《東張》要搵人代班，就連拍攝中嘅劇集《隱形戰隊》都要易角！藝人犯事難免要雪藏過冷河，但又係咪一定冇運行？未必！

陳偉琪

《愛．回家之開心速遞》入面嘅「細龍太」2019年10月揸車經過跑馬地時同的士相撞，事後陳偉琪酒精呼氣測試驗出體內酒精超標2倍有多，被警方控以酒後駕駛罪名。陳偉琪上年5月出庭時認罪，被判罰款5千元兼停牌1年，另要自費上駕駛改進課程。點知曾經應承戒酒嘅陳偉琪，喺案件判決前多次被影到飲酒破戒，形象插晒水。本身陳偉琪入咗TVB「雪櫃」一排冇得演「細龍太」之餘，早前同TVB約滿亦不獲續約，即使講明仲想做幕前，都要轉行賣火腿。

郭子豪

TVB爆肌男郭子豪同樣喺2019年因為酒後駕駛而惹官非。當年3月郭子豪喺尖沙咀揸車時遇到警察路障而要接受呼氣測試，結果錄得超標一倍而被捕。事後佢曾經回應傳媒話事發時喺屋企，半日後先肯認。前年6月法官裁定郭子豪罪成，被判90小時社會服務令、停牌1年同自費上駕駛改進課程。

同樣都係酒駕，郭子豪事業反而冇太大影響，座底有6套劇有份拍等播，新版《十月初五的月光》仲係做原本唐文龍飾演嘅金勝，有機會跑出！

楊明

近年上到位做男主角嘅楊明，都唔止一次犯事惹官非︰2005年飲醉酒揸車，仲要停低架車喺佐敦道路中心「恰一恰」，警員發現佢酒精超標，事後被判罰款7千元兼停牌一年；一年後楊明喺夜店襲擊保安員而被判守行為，但係期間又因為飲大咗，用回鄉卡當八達通去便利店買嘢買唔到而搗亂，被判社會服務令150小時。上年8月揸車時失事喺半山撞爛一幅石牆，有報導話楊明當時腳步浮浮。楊明被控3項罪名，今年3月法官裁定「拒絕提供血液樣本作酒精測試」罪名不成立，但「不小心駕駛」及「車窗玻璃光度不足」罪成，本來要還押候判，但楊明嘅代表律師提出推翻認罪，案件要重新審理，楊明獲准保釋。

官非一大疊，但係對楊明喺大台嘅前途有冇影響？見唔到喎！

羅鈞滿

又係酒駕累事。喺《天與地》演年青版鼓佬（林保怡）而被人認識，參加藝員歌唱比賽《星夢傳奇》又入到五強，仲同主播張文采拍拖，本來羅鈞滿有望接捧上位，但係負面新聞接住嚟。

先因為盛傳背住女友溝女而被張文采狠飛，2015年又喺韓國被指得罪當地「大佬」而鬧上警局，滯留韓國2個月；到2016年就因為飲完酒揸車遇上警方路障要「吹波波」，測出酒精比例超標2倍以上。上庭時羅鈞滿辯稱只係飲咗2杯白酒，被法官反駁「除非一公升一杯，好心唔好講呢啲」。法官判羅社會服務令100小時及停牌兩年，仲要喺停牌期最後3個月接受駕駛改進課程，否則會即時監禁。同年羅鈞滿同TVB解約，羅表示會北上發展，不過似乎冇咩作品。今年4月林峯同周秀娜主演嘅網劇開鏡，其他前TVB人趙永洪、古明華等都有份，但係同樣參演嘅羅鈞滿喺海報上面連名都冇，真慘情。

陳展鵬

煎pan都上過court？真！2017年佢仲同單文柔拍緊拖嗰陣，上山頂浪漫一番嘅時候俾狗仔隊撞破，煎pan揸車走人時撞到採訪車，因而被控不小心駕駛。案件開審時陳展鵬以陪阿媽覆診為由缺席，搵代表律師辯護，最終法官判陳展鵬罰款3千蚊。當時已貴為視帝嘅陳展鵬，事後的確少咗劇拍，但似乎同公司決定有關，多過因為呢單官司。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！