TVB藝訓班面試大公開 參加者大曬模仿才藝 網民：好騎呢

無綫電視TVB新一屆藝員及電視製作人員訓練班吸引逾千人報名，反應相當熱烈。而TVB亦好重視呢次嘅招募，早前喺首輪面試入面，唔單止有副總經理曾志偉、首席創意官王祖藍、兩位助理總經理曾勵珍同樂易玲出現，將會擔任今屆藝員訓練班校長嘅馬浚偉亦有到場同一班面試者打氣，曾志偉同王祖藍仲一唱一和咁透露希望將今屆藝員訓練班打造成真人騷：「好似《全民造星》咁！」，王祖藍自嘲連佢都可以捱到今日，就知門檻一啲都唔高。

近日節目《東張西望》就直擊第二輪面試情況，訪問過程中一班「明日之星」仲即場表演佢哋嘅才藝，除咗唱歌、Rap呢啲基本嘢，仲有面試者表演模仿二胡聲、打功夫等。而其中一位皮膚較黝黑嘅參加者就話好多人都覺得佢似吳卓羲加王大陸，仲即場模仿王大陸喺電影《我的少女時代》嘅台詞，位位都好有個人特色。

馬浚偉接受訪問嗰陣就話，如果要用一個導演或編劇身份去揀真係好難，仲話兩次面試已經搵到啲好有特色嘅演員：「你無辦法幫佢改，有啲人天生有某啲特性。」「唔係話佢奇怪，而係有啲真係好有特色，自然就可以切入某啲角色。」不過一班網民就唔係咁睇，指面試嘅人好多都好騎呢，仲話佢哋表演得好搞笑，紛紛留言：「In 得TVB都係kam人，陰公」、「做乜啫你」、「加個peace就當咗自己rap？」、「青山走犯?」、「如果佢係我朋友我依家去搵窿捐，交埋晒咁嘅xx。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！