Tyson Yoshi女友被批醜樣 男友身份霸氣護花獲網民讚有擔當

人氣獨立歌手Tyson Yoshi（程浚彥）自上年《拉闊音樂會2021 - 風火雷電》憑獨特歌曲風格及爆肌身型，成功冧掂一班粉絲，人氣急升。事業發展順利嘅佢，愛情亦同樣得意，佢同女友Christy拍拖4年，一向感情穩定，更不時喺社交網站放閃。不過近日Christy就被連登討論區網民抨擊外貌，指佢似「靚版馬蹄露」。為咗呢件事，Tyson Yoshi喺社交網站開直播期間護花，並話：「我鍾意就得」，被網民評為「港版Will Smith」。

近日Christy喺社交網文上載一條關於素顏教化妝嘅影片，之後有網民喺連登討論區出PO指其外貌一般，兼似「靚版馬蹄露」，結果引起網民熱烈討論，仲紛紛留言表示認同，例如「真係好X樣衰」、「化妝既威力好強大」、「有自信既女仔真係好得人驚」、「馬蹄露咁款」、「佢永遠都要37面 個鞋抽樣好難搞」及「真係幾樣衰 完」等等。另外，亦有唔少網民認為唔關其他人事，只要Tyson Yoshi鍾意就得。

對於網民嘅抨擊，Christy回應得相當大方，獲得網民力撐及讚佢EQ高，而Tyson Yoshi亦有喺社交網站開直播期間護花，並話：「好樣衰？咁點呀？我鍾意呀！出面就要俾人鬧？人紅是非多另一面係好，我都明，但呢件事上，我係作為站喺男朋友嘅立場！你試吓行行吓街、拖拖吓手，突然有個蒙面人話你好樣衰、之後有一大班唔知喺邊條巷走出來嘅人，叫你企喺度，辯論你個樣好唔好睇，睬你都傻啦，現實生活可以直接走！佢哋論點係討論區可以討論好多嘢，但保護身邊人都做唔到，點做男人！」

唔少網民都留言大讚及欣賞佢，留言話「有Tyson出到聲幫口已經勝過千言萬語」、「港版Will Smith」、「有擔當！」、「男友力max」、「真男人 support」、「你真係好Man，Christy好幸福」、「真係樣衰，不過欣賞tyson出黎護返條女」及「真男人！好男友！Proud of you and Christy is really so beautiful」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！