Tyson Yoshi屋企曝光後攞外賣都提心吊膽 30歲後轉戰幕後有意做MV導演
人氣獨立創作歌手Tyson Yoshi(程浚彥)將於下月5日至8日舉行首個個人大型演唱會《MY NEW WORLD ORDER》,近日佢擔任鄭裕玲(Do姐)主持嘅電台節目《口水多過浪花》嘉賓,除咗講演唱會之外,佢仲講到自己將會喺30歲轉行。
Tyson Yoshi自上年聯同姜濤、Jer及林家謙舉行《拉闊音樂會2021 - 風火雷電》憑獨特歌曲風格及爆肌身型,成功冧掂一班粉絲,人氣急升。籌備演唱會中嘅佢喺前日(26日)作客《口水多過浪花》,一開始就被Do姐問及入行前嘅經歷,佢就話以前喺化妝品品牌做店舖設計,負責台灣、香港同日本嘅店舖,而當時嘅老闆好好人,好支持佢做音樂。
提到自己喺香港方面嘅音樂發展,Tyson Yoshi就覺得自己係風火雷電先開始為人認識,因為之前《Christy》好受歡迎,但現實喺街就係無人認得,不過因為咁令佢更加踏實去做音樂。被問抗唔抗拒出名時,佢就好感激支持佢嘅人,但係前排去英國開騷前有少少焦慮,佢唔想俾人認到,因為覺得唔自在,同埋講佢冇所謂,但講佢身邊人就接受唔到。
喺今年5月,有眼利網民發現TVB財經台睇樓節目《家居.築則》介紹Tyson Yoshi嘅屋企。喺訪問中講到屋企地址曝光一事,佢表明自己好嬲:「我好嬲,嗰個我好嬲,但係又唔知可以點,始終間屋係我daddy mommy,佢哋話ok就ok,但係我又冇得怪喎,佢哋唔識去幫我諗。」仲話本來問可唔可以開埋佢個名,因為知道佢係做音樂,不過佢就諗嗰陣時喺台灣,香港冇人識佢,唔明點解要攞佢個名,不過佢就同媽媽講:「可以嘅,不過唔好講我個名囉」。
之後,佢話風火雷電完咗之後,呢件事一直都喺佢個腦入面,而佢亦有諗過會發生,只係冇諗過咁快,因為《家居.築則》都幾偏。屋企地址曝光後,佢連攞外賣都要提心吊膽:「而家啲外賣,我都係隔住道門叫佢擺喺門口,因為我試過一打開門,跟住送外賣嘅朋友話終於見到你啦Tyson。因為佢送開就係嗰區呀嘛,佢會傳出去㗎嘛,其實係都幾困擾,冇諗到喺屋企門口都會俾人認出。」
去完英國開騷後,佢覺得自己情緒好返好多:「一去到市中心,即係銅鑼灣或者旺角嗰啲,有人見到我,我慣咗好急步走,因為我試過停低一陣間,影一個就好多(個),但我又唔想Say no,我從來未試過Say no話唔影,所以成日都要好急步咁走。人哋個眼神一望我就開始驚,一入銅鑼灣我就要耷低頭同埋標冷汗。」而Do姐就鼓勵佢克服。
另外,佢打算2年後邁入30歲就唔做歌手,因為佢覺得唔同年紀要做唔同嘅嘢,佢想30歲後做一啲唔同嘅嘢,想轉做幕後,例如MV導演,因為佢最近嘅3至4個MV,自己都有參與導演工作。佢亦認為人一世唔會做死一份工:「成世人做死一樣嘢係冇可能㗎。因為有時我望住daddy mommy,我覺得冇嘢做就真係好似佢哋咁留喺屋企。佢哋唔Enjoy呀,成日話悶,我叫佢哋出去上吓堂、學吓咩班,佢哋又跳唔出舒適圈,所以我成日望住佢哋諗,我老咗真係唔要好似佢哋咁樣。」
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!