【政情】學民缺席 泛民政黨年宵收入大賺

【now新聞台】農曆年假結束，不少打工仔都要開工，正所謂「初四咁嘅樣」。不過，泛民政黨中人好多都是「四萬咁嘅樣」，因為他們在年宵市場大有斬獲。

佔領運動之後，泛民政黨在民調的支持度，一度全線下滑。不過，多個政黨年宵市場的籌款攤檔，出售與雨傘運動相關的物品，收入都打破了紀錄。

公民黨籌得37萬，是泛民主要政黨之冠。佔中象徵物品黃色雨傘，開賣一日就因為銷情太好，而要加價一百元。佔領運動後，公民黨都學年青人創先河，在攤檔旁放了習近平的紙板人像，再附送一個諷刺劉江華的垃圾筒，吸引大批市民去影相，順道買東西。

工黨籌到13萬7千，民主黨都籌到15萬，全部都是新高。民主黨主打產品無向佔中埋手，反而向齊昕「抽水」，推出一條「I am just 毛巾」，結果大賣四千條，不少人一邊購物，一邊叫民主黨唔准「袋住先」。

年宵攤檔盤數咁理想，令泛民政黨打了強心針。不過，亦有可能是錯覺，因為去年收入45萬的大贏家學民思潮，忙於佔中，無時間搞年宵，結果今年缺席，有可能因此令其他泛民得益。

不只學民無擺檔，人民力量今年都無競投維園年宵。但他們就在年宵之前數天，在銅鑼灣渣甸坊港鐵站門口擺街站義賣，賺到少少錢。大愛同盟「搭單」開了兩晚檔，都籌到兩萬元，主打賣揮春、利是封，毋須交租、本小利大。

政情也有問過民建聯年宵成績，主席譚耀宗表示，負責年宵的職員仍未上班，暫時未知收入多少，但由於貨物都以街坊價出售，應該租都不夠交。民建聯的強項向來是揼心口，也不用貪圖這些蠅頭小利。

政治一日都嫌長，年宵市場又何嘗不是？如果現在才搞年宵，最受歡迎產品，相信最搶手的會是麒麟，黃傘也要靠邊站。