ViuTV改革7點半檔期 《MM730》接棒《囝囝女女730》播出

ViuTV節目《囝囝女女730》每集搵嚟唔同嘅年輕藝人或KOL做嘉賓，不過可惜收視及討論度長期偏低。最近ViuTV作出改革，由今日（4日）開始推出全新節目《MM730》系列，呢個系列好似《晚吹》系列咁每日有唔同主題適合唔同人睇，相信會為觀眾帶嚟唔少驚喜，而家就同大家睇下有啲咩節目啦！

星期一
《困．獸．鬥》由程人富、洪嘉豪、楊安妮（Win Win）、米露迪及「Dee姐」陳海寧擔任主持，每集佢哋都會被困喺一個神秘嘅室內空間，透過鬥智鬥力嘅小遊戲分出勝負，仲會有獎賞同懲罰添呀！

星期二
《粉絲福利署》搵嚟黃正宜（阿正）、旨呈（鄺旨呈）及蔡寶欣（Pony）擔任主持，節目每集都會搵唔同嘅歌手同佢嘅忠實粉絲一齊玩遊戲，實行近距離大派福利。

星期三
《Auntie妳好》搵嚟ERROR成員保錡、鍾慧冰（冰姐）及媚姨做主持，並會邀請唔同嘅年輕藝人及KOL做嘉賓，透過傾計同玩游戲去令大家了解姨姨們嘅世界。

星期四
《娛論潮》由馬騮搣（Gladys）及黃奕晨（Dixon）擔任主持，每集都會唔同嘅星級嘉賓大講娛樂文化，齊齊探討娛樂及潮流文化嘅趨勢。

星期五
《男女自然觀察學會》搵嚟岑珈其、P1X3L成員歐鎮灝（George）和葉振弘（Marco）、許寶恆（Alice）、楊安妮（Win Win）及何洛瑤（Sica）擔任主持，節目將會喺生活層面上致力研究男女生態。

以上節目適合唔同嘅觀眾年齡層，唔知有冇一個啱你心水呢？有興趣嘅話今日開始準時收睇啦！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！