ViuTV開記者會落實拍《全民造星5》 網民唔buy︰捧好前幾屆嗰班先啦

堪稱ViuTV王牌節目嘅《全民造星》，過去4屆捧出MIRROR、ERROR、P1X3EL、COLLAR等團體同一班藝人，收視同話題性都十分強勁。ViuTV尋晚宣布，將會喺今日（15日）下午舉行《全民造星5》記者會，公布節目詳情。

過去幾屆都係喺夏天開拍，十一月左右出街，年尾決賽。今年嘅舉行時間比往時遲，估計可能同MIRROR 呢2個月要開騷有關。早前有傳《造星5》將會再次招收男參賽者，並且會喺海外揀蟀，由幾位MIRROR成員姜濤、Anson Lo（盧瀚霆）及Edan（呂爵安）分頭前往新加坡、美國、加拿大及英國等地方挑選參加者。據知加拿大方面已經搵咗當地中文電台做合作夥伴。

不過消息公布之後，ViuTV FB上多數嘅留言都唔太支持再開第5季，有人認為4屆《造星》後已經有唔少人入咗Viu，應該善用手頭上嘅藝人先。「Mirror係造星1出身，12個都未肯完全投資落去，個個都係人才嚟㗎」。亦有人擔心節目唔夠新鮮感，「如果又係同一條formula 去分組， 派導師帶， 拍各組內部中間有矛盾，然後和好去表演，淘汰組員依依不捨淚別….大佬拍咗四季都係咁， 同一條橋唔好出第五次啦好悶」。

亦有人認為三十幾年前TVB新秀都照樣年年搞，唔會有問題。「有助搵到多D藝人加入娛樂圈甚至ViuTV，加大自己ViuTV藝人班底，其實係好事」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！