ViuTV新節目《戀愛Staycation》似足日本《雙層公寓》 招單身男女參加搵真愛

ViuTV真人騷節目一向大受歡迎，正熱播嘅《賭命夫妻》更成為大眾茶餘飯後話題，ViuTV決定乘勢追擊，開拍全新男女配對真人騷《戀愛Staycation》（暫名），並喺官方Facebook招募單身男女參加。

節目結合Staycation元素，招募年滿18-35歲同時又係單身嘅香港永久性居民入住大屋共同生活約一星期，玩法似足日本真人騷《雙層公寓》。不過，節目組將準備一連串戶外活動，有機會係遊艇派對、大自然露營體驗或豪華晚宴舞會等等，畀參加者互相了解，從而搵到真愛。

ViuTV喺Facebook嘅招募帖文至今已獲逾2500人讚好，相當受歡迎，連沈殷怡（Shirley）、練美娟（娟姐）及李昭南（Mishy）都留言表示想參加，沈殷怡仲話：「舉手舉腳表示想參加！公司比個機會我搵春天好無？」。唔少網民都留言話好期待，又預測節目主持班底會有梁祖堯、余迪偉、強尼、陳嘉倩等；亦有網民表示希望ViuTV呢次真係搵真素人參加，而唔係KOL或ViuTV幕後：「最後又搵一堆唔太出名嘅model藝人參加」、「咪又係試當真＋啱channel＋熊仔頭啲女」、「之前聲稱素人都唔係搵真。素人」等等。不過有網民就對參加年齡有意見，留言：「哇，18歲就要去玩呢啲？應該調整下個歲數啦」、「過咗35單身係罪」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！