ViuTV《全民造星IV》《神的女主角》《香港秘密搜查官》今晚首播 網民齊嗌好期待：成晚離唔開電視了

TVB同ViuTV嘅電視大戰越演越激烈，11月係無綫嘅台慶月，所以台慶劇及綜藝節目已經陸續喺翡翠台及J2播出，而ViuTV方面都有新安排，喺今晚（1日）一次推出三個全新節目，分別係皇牌選秀節目《全民造星IV》、「教主」Anson Lo招募MV女主角《神的女主角》及Mike導回歸之作《香港秘密搜查官》，等觀眾可以由9點半開始坐足兩個鐘。

《全民造星》成功打造出人氣男團MIRROR同ERROR，而嚟到第四季《全民造星IV》就係全女班陣容選秀，喺今晚9點半開始大家就可以睇96位參賽者嘅表現。去到10點半就輪到由MIRROR人氣成員「教主」盧瀚霆（Anson Lo）主持嘅《神的女主角》，教主會透過呢個節目招募MV女主角，一班「神徒」千祈唔好錯過喇！最後就安排《香港秘密搜查官》喺11點播出，節目由「無制限OT編集団」製作，並搵嚟P1X3L成員Marco、陳漢娜及Asha（徐㴓喬）擔任主持，早前Mike導已經喺社交網站預告今次繼續會有爆炸場面，搞到一班網民都好好奇係唔係炸生Bear或者生菜。

唔少網民知道今晚ViuTV有三個全新節目都非常興奮，紛紛留言話：「慘了,成晚離唔開電視了」、「Yeah 今晚就開始有得睇Anson Lo新綜藝節目《神的女主角》」、「《神的女主角》終於嚟啦 晚晚坐定定睇！」、「未來兩個月week day唔使再出街食飯」、「到底生啤未來3星期會點呢！好期待#香港秘密搜查官」、「今晚全力支持造星4！！」、「今晚坐定定支持！」及「每日返到屋企就開ViuTV ，仲會另外校時間制鎖定特別喜歡嘅節目以防萬一 《神的女主角》有LoLo教主唔使講一定全部睇晒，《全民造星IV》見到班幕後咁熱血，相信個節目一定好睇好難唔支持，《香港秘密搜查官》節目組應該帶觀眾睇D平時睇唔到嘅嘢都好有興趣。今晚已經約咗生啤同生菜一齊睇la~」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！