ViuTV《嫌疑事件簿》對撼TVB《死因有可疑》 兩邊首播反應充滿負評:真係拍得麻麻

·3 分鐘文章
ViuTV《嫌疑事件簿》對撼TVB《死因有可疑》
ViuTV《嫌疑事件簿》對撼TVB《死因有可疑》

無綫與ViuTV最近展開一連串綜藝大戰,兩台被指疑似抄韓國綜藝《犯罪現場》嘅節目,TVB《死因有可疑》與ViuTV《嫌疑事件簿》,就喺前日(14日)開戰,同時間於晚上10時半首播,而TVB今次為咗唔再「輕敵」,特登將節目加長至三節,就連11點《晚間新聞》都延遲15分鐘播放。雖然兩台相當重視,事前亦做足宣傳工作,但兩個節目播出後似乎都有唔少負評出現。

TVB《死因有可疑》首集以「序章-校園幽靈殺人事件」作開場,由方力申飾演偵探,與張秀文、何廣沛、劉佩玥、游嘉欣及郭子豪一同調查校長兇殺案,過程以一問一答形式進行,以誤導方式隱瞞真相,同時搜證調查互選真兇。不過,各演員就似乎未係好了解玩法或者唔習慣拍攝模式,例如劉佩玥同張秀文成日忍唔住笑,張秀文又需要何廣沛提醒先知道打開嘅locker擁有者原來係自己。

網民大指節目似鬧劇,完全無懸疑緊張感,表示:「睇咗陣感覺好兒嬉,似無聊趣劇多啲」、「本以為可動動腦筋,但睇晒全集,只得一個亂字,毫無邏輯!失敗之作!」等等。節目播映時亦彈出嚴正聲明:「本節目內容純屬虛構,與真實世界無關,觀眾切勿模仿。由於節目製作人手太少,budget太低,所以有極多漏洞同穿崩位。又要勞煩各位網友瘋狂cap圖恥笑,真係唔好意思。不便之處,敬請原諒。」有網民就指出呢種「戴頭盔」自嘲方法好似抄橋ViuTV早前同樣坦承唔夠budget嘅《Error 自肥企画》。

ViuTV《嫌疑事件簿》首集播出就以「渡假村油漆殺人事件」為題,搵嚟張建聲、談善言、黃溢濠、鄧麗英、陳凱詠(Jace)、李炘頤(Alina)、米露迪、歐鎮灝(George)共8名玩家喺度假村8個房間拍攝。雖然佢哋明顯比TVB藝人熟悉自己角色同劇本,能夠邊玩邊推理邊個係最大嫌疑人,但網民紛紛指玩家人數太多,人物關係混亂,加上劇情複雜,喺短短半小時節目入面消化唔切:「我有盡力去睇,不過都係一頭霧水」、「雖然係搜證階段,但尋晚剪輯到好散,咁樣作為第一集有啲趕客,唔係人腳吸引真係有少少睇唔落去 ……希望之後可以緊湊番少少啦。」、「只係拍嘅人先知玩乜其實冇意思,只係一套劇集,唔係綜藝。」等等。仲有唔少網民都對TVB《死因有可疑》同ViuTV《嫌疑事件簿》作出比較,認為兩台都拍唔到個節奏出嚟,真係拍得麻麻咁話,睇嚟兩個節目都反應平平。

《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《嫌疑事件簿》截圖
《死因有可疑》截圖
《死因有可疑》截圖
《死因有可疑》截圖
《死因有可疑》截圖
《死因有可疑》截圖
《死因有可疑》截圖
《死因有可疑》截圖
《死因有可疑》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能