ViuTV加入戰團 宣佈4月搞樂壇頒獎典禮

香港樂壇嘅四張成績表《新城勁爆頒獎禮》、《叱咤樂壇流行榜頒獎典禮》、《十大中文金曲頒獎禮》及《勁歌金曲頒獎典禮》早前已經圓滿結束，ViuTV喺噚晚終於宣佈加入戰團，並將會舉行香港第5個樂壇頒獎禮「CHILL CLUB推介榜年度推介20/21」。

有消息指ViuTV喺上年已經想舉行頒獎典禮，仲喺10月嘅節目巡禮中話頒獎禮嘅賽果係由全民投票產生，不過之後未有其他消息。去到噚晚播出嘅《CHILL CLUB》，主持人駱振偉宣布將於今年4月舉行首屆音樂頒獎禮「CHILL CLUB推介榜年度推介20/21」。其他頒獎典禮都係年尾總結，不過ViuTV嘅計法就同佢哋唔同，ViuTV會統計由上年5月31號去到今年2月28號歌手們喺「CHILL CLUB推介榜嘅成績」，然後頒發年度推介歌曲、年度推介男歌手／女歌手／組合及新人等獎項，稍後佢哋會公佈更多詳情。

近年嘅樂壇頒獎禮賽果引起唔少爭議，今年就以《勁歌金曲頒獎典禮》爭議性最大，例如絕大部分獎項繼續由無綫親生仔、英皇及星夢歌手瓜分、周柏豪及胡鴻鈞「打和」齊奪「最受歡迎男歌手」等等，被網民取笑係「劇集金曲分奬典禮」，公信力備受質疑。而《CHILL CLUB》反而係集齊香港大大小小唱片公司嘅歌手，連由莫文蔚主唱嘅大台劇集主題曲《呼吸有害》都可以登上「Chill Club 推介榜」冠軍位置，相比之下似乎較有公信力。

對「CHILL CLUB推介榜年度推介20/21」嘅朋友，記得密切留意喇！

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！