雅虎香港新聞 ViuTV《男排女將》今首播 重溫香港經典青春偶像劇
ViuTV青春偶像劇《男排女將》搵嚟鄧麗欣（Stephy）、顧定軒、一班MIRROR及ERROR成員主演，劇集以排球作為題材，講述King（顧定軒飾）及Bobby（Anson Lo飾）等人原本係甲一排球隊隊員，不過因身高未能達標嘅關係被逐出球隊。而Stephy飾演嘅蔣家瑜因幾年前嘅重大打擊，令佢對前景失去信心。當佢哋遇上後令幾位年輕人命運改寫，而蔣家瑜更重新愛上排球，成為香港第一位男子排球女性教練。劇集將於今晚首播，其實香港過往都有唔少經典青春偶像劇，不如而家就同大家數一數啦！
《戀愛自由式》
《戀愛自由式》由陳文媛、蕭正楠、唐寧、黃宗澤、鄧麗欣及傅穎等人主演，劇集以游泳作為背景，講述遊嫻（陳文媛飾）及遊穎（唐寧飾）係兩姊妹，但因父母離異而分別居住於香港及美國。樂觀嘅遊嫻天生有長短腳缺陷，但並冇氣餒，更盡心盡力幫爸爸打理泳會生意。而遊穎就係游泳健將，但性格非常任性。二人多年後相遇，但竟然同時愛上隊友Edwin（蕭正楠飾）。劇中泳手喺緊張關頭時使出唔少必殺技，例如「破冰轉身」、「片石轉身」，「擾流泳法 」及「磁浮泳法」，唔知大家仲記唔記得呢？
《四葉草》系列
《四葉草》系列絕對係80及90後嘅集體回憶，首部曲《當四葉草碰上劍尖時》、二部曲《赤沙印記@四葉草2》及三部曲《盛裝舞步愛作戰》都非常受歡迎，劇集透過運動為題材，講述佢哋如何為夢想奮鬥，當中仲牽涉唔少校園及愛情橋段，成功引起大家嘅共鳴。而主題曲《Shining Friends》及《Find Your Love》等喺劇集出街時播到街知巷聞，就算而家播歌曲嘅前奏，相信唔少人都會記得。
《撻出愛火花》
劇集搵嚟謝霆鋒、楊張新悅及元華等人主演，劇集以柔道為題材，講述趙家俊（謝霆鋒飾）加入柔道教練羅彬（元華飾）嘅一本柔道館，天資聰穎加上後天努力，趙家俊好快就考到黑帶，仲同助教羅晶晶（楊張新悅飾）互生情愫。柔道教練羅彬將秘技「風火山林」傳授俾趙家俊，最後佢喺比賽中成名，更赴日本發展。《撻出愛火花》播出時，謝霆鋒嘅柔道有姿勢有實際，唔少人仲話好想學「風火山林」。
《百分百感覺》
《百分百感覺》嘅電影版及劇集版都好受觀迎，而2002年嘅劇集版本由陳曉東、方力申、周勵淇及李彩華等人主演，仲有唔少藝人歌手客串，例如鄭中基、舒淇、陳冠希、蘇永康及楊千嬅等等。劇情講述Jerry（陳曉東飾）與許樂（方力申飾）除咗係中學同學之外，佢哋仲係好朋友兼同屋主。喺一次出版社公司舉行嘅活動中認識Cherry（周勵淇飾），佢哋就決定公平競爭咁追求Cherry，後來佢哋又喺機緣巧合下認識芳芳（李彩華飾）。劇集除咗有唔少搞笑劇情之外，仲講咗唔少男女嘅愛情觀念，係好多香港人嘅回憶。另外，由主角們所唱嘅劇集主題曲《兩男一女》，如果而家聽到「大概當我遇上一個令我能迷戀 誰亦會被迷魂並未在乎長與短…」，相信大家都依然記憶猶新。
《青春@Y2K》
《Y2K》系列第二輯，亦可以話係系列中最好睇嘅一輯，劇集搵咗余文樂、苗子揚、林慧妍、蔡卓妍及唐詩詠等人主演，講述一班學生喺運動競賽中，培養團結、積極及上進嘅團隊故事。劇集除咗內容豐富之外，另一吸引之處當然係劇中嘅靚仔靚女，而且仲有好多打籃球嘅畫面，睇到唔少網民尖叫。
《荳芽夢》
劇集由翁靜晶及吳大雄主演，講述一班中三女學生傾慕一個靚仔運動健將，其中一幕吳民雄喺沙灘用蠟燭砌出心型，仲坐低彈結他與翁靜晶對望，當年嚟講可以係話羨煞旁人。劇中「Cindy」翁靜晶及「Rowena」露雲娜嘅清純學生look，成功迷倒唔少少男，絕對係60後嘅回憶。
《IQ成熟時》
劇集由蔡楓華、鍾保羅、莊靜而、鄧藹霖及鄧慧詩主演，講述聖羅蘭英文書院預科學生花灑（莊靜而飾）及朱仔（鄧靄霖飾）等人非常貪玩，除咗經常整蠱老師之外，佢哋仲影響學校聲譽。為咗改善學習風氣，校長「大白鯊」就取錄咗三個品學兼優嘅男學生。女校男生嘅佢哋，一返學就被整蠱，之後仲產生唔少笑料。當時麗的劇集《IQ成熟時》嘅收視撼贏同時段無綫嘅《荳芽夢》，劇集能夠打破無綫慣性收視，真係唔惹少呀！
《衝線》
劇集搵嚟羅仲謙、沈震軒、蔡思貝、林夏薇及吳若希等人主演，以單車為題材嘅《衝線》，主要講述一班年輕人因為工作壓力及辦公室政治煎熬下，慢慢地失去人生目標，佢哋透過單車比賽中領悟到團隊精神、重拾鬥志及人生目標。
《救妻同學會》
無綫周播劇《救妻同學會》由胡鴻鈞、劉佩玥、黃美棋、黃庭鋒及及伍富橋等一班後生仔女主演。劇集以72小時救妻為題材，講述電腦工程師李恩朗（故鴻鈞飾）與太太趙卓穎（劉佩玥飾）原本過住平凡幸福嘅生活，但太太喺聖誕節當日被擄走，更屈指恩朗侵吞一億港元，需要72小時之內交還。期間佢重遇昔日宿友，更於調查過程中想起與宿友嘅往事。
