Yahoo娛樂圈｜專訪彭秀慧 童年時媽媽一句話影響自己最深 熱愛舞台時刻提醒自己「我就係咁嚟」

舞台劇出身的彭秀慧Kearen近年向多方面發展，執導《29＋1》及《阿媽有咗第二個》外，亦參與不少影視作品。繼個人劇場作品《29＋1》、《再見不再見》、《月球下的人》及《Tiffany》後，睽違多年未有自編自導自演獨腳戲的Kearen將於11月1日起演出新作品《失憶【諒解】備忘鹿》，迎來49＋1之時再度向觀眾展示個人人生經歷，希望作品繼續可以為觀眾帶來一個溫暖的擁抱，對回憶、經歷及過去種種有一點釋懷。

《失憶【諒解】備忘鹿》取材自媽媽 體會腦退化的可怕

今次Kearen的作品取名《失憶【諒解】備忘鹿》，顧名思義談及記憶與諒解，其中一個取材來自於媽媽的離開：「呢幾年對我嚟講媽媽嘅離開係一個點子，但係我唔係要寫一個劇嚟悼念我媽咪，只不過我諗起當我見證到佢最尾階段腦退化嘅時候真係好可怕，個思緒混亂、成個性格唔同咗對我嚟講係好驚訝，呢樣嘢對我好深刻。腦退化某程度上有種失憶嘅症狀，你一定唔會淨係講失憶，你一定係講透過佢明白咗啲嘢！」

失憶為題材看似沉重，劇名卻多了一點玩味，以城城的作品《失憶【諒解】備忘錄》作參考，Kearen發現當中「不敢坦承面對記憶」的意思非常有趣，再加上希望一改以往「文青風格」，在略為泛濫的「文青風」中作出轉變：「好快見到個『錄』字諗到一隻鹿個『鹿』！突然間出現咗Memories（記憶）走咗去咗邊，佢變咗頭上嘅鹿角，突然間覺得件事好浪漫，我已經有咗啲舞台上嘅畫面，所以即刻就決定係佢啦！」

童年時媽媽一句話影響自己最深 直認反叛 欣賞現今年輕人

以媽媽為題材之一，Kearen提到成長過程原生家庭對人的影響尤其大，最記得童年時媽媽的一句話：「媽咪好鍾意自己解決問題，好細個想食嘢好自然叫媽咪幫我開，佢就會話『要食就自己想辦法』，呢句40幾年我都仲記得，原來呢個係根深蒂固嘅思維嚟，我覺得呢個係佢嘅信念，可能喺某啲人心目中我係好Tough好唔甘心，有啲嘢會要做到底，我覺得呢個可能係媽媽嘅遺傳。」正正這份不服氣及反叛，令Kearen經常反問「點解唔得」，令自己可以完成意想不到的事情。近年多與年輕藝人合作的Kearen亦透露近來遇到不少新一代都會不斷問「點解唔得」，興幸新一代年輕人都有份不服氣的心，擁有屬於新一代的勇敢，創造更不一樣的世代。

《29＋1》的延續 熱愛舞台提醒自己「我就係咁嚟」

歷年來獨腳戲作品都是自己的人生寫照，猶如一本成長筆記。即將踏入49＋1階段，Kearen坦言《失憶【諒解】備忘鹿》某程度上屬於《29＋1》的延續，每個年齡層正在面對、關心屬於自己年紀的各樣事情：「好老套地去到呢個年紀，我哋要面對好多以前嘅嘢，講吓以前幾開心，或者曾經滄海，又或者我仲記得啲咩嘢，諗吓有啲咩記憶你真係想記得喎！」

再次踏上舞台自編自導自演，由決策、執行到結果都由一人承擔，縱然有點「攞苦嚟辛」，對Kearen卻依然是特別的存在，更直言獨腳戲就是自己的「恩人」、「伯樂」，扭轉自己人生的地方：「成日都會緊張，但係我就係咁嚟！今日嘅你同二十年前嘅你有咩分別啊，你唔應該有分別囉，應該相信自己，亦都相信觀眾相信我」

Credit：

Make Up: Sharon Lam

Hair Styling: Jo Lam @ Salon Trinity

Wardrobe：45R

Venue：No.5 Studio HK