Yahoo娛樂圈 ｜專訪 JACE陳凱詠 被批評「做埋晒啲咁嘅歌冇人聽」偏要挑戰 獨立兩年日日呻笨：因為鍾意攞苦嚟辛！
JACE陳凱詠，最近出新歌〈SWITCH〉玩大膽風格卻引來網絡罵戰，「偏鋒」、「不正常」被用作形容她的曲風與形象。JACE：「啲人話『做埋晒啲咁嘅歌冇人聽囉』，有好多㗎！佢數字上一定唔係最多人聽，但我對你的有信心，你哋對我有信心，所以我繼續做。」就連〈SWITCH〉歌詞都明言「呢首歌有骨」，彷彿已預視大家的接受程度：「有骨呀！你小心哽親呀提提你！無論音樂類型定我嘅歌詞，佢都要你消化吓，唔容易食。」越是偏鋒，偏要挑戰，說不定開了眼界以後，大家會擁抱更多元與更多可能性？
好友鍾雪瑩度身定造歌詞，近來最大難關竟為搞強積金？
JACE跟鍾雪瑩是好友，對方奪影后，會大跳大叫比對方更興奮的那一種。今次再邀來鍾雪瑩填詞，不需溝通已被看透，JACE：「寫經歷唔係我要求，但鍾說（鍾雪瑩）就放咗入去，整親隻腳、做司儀呀，呢啲係佢嘅心思，幾可愛，睇到都覺得好貼身。」今次〈SWITCH〉歌詞講身份變換，是最近她想擁抱的課題：「我用呢首歌提醒自己轉換 、係咁變係冇問題。 好多歌我嗰刻未完全做到，但我有個新領會，我好想自己做到，甚至話畀大家聽呢件事係好，我就會擺落歌度。而加我想轉換角色，我要相信呢件事好玩，唔係跳脫麻煩，就整首咁嘅歌。」
對比起大膽的曲風、MV風格，她認為自己在崗位上的轉變更需要適應：「崗位上呢一年我好多變，要處理好多唔同狀態，藝人、經理人自己都要做。以前我覺得自己太跳係唔好，但我而家冇得揀，我真係要跳，所以要好好擁抱自己。」記得「一腳踢」的她，早前大呻要搞強積金，JACE：「份form我未搞呀，要scan畀佢，我暈喇，好頭痛！」
「創作都唔坦白、唔真誠，咁做嚟做咩？」
JACE是位坦白直率的人，訪問時覺得，連她自己都很認同：「如果做創作都唔坦白、唔真誠，咁做嚟做咩？世界太多嘢太多包裝，人生咁短，我冇需要唔坦白。」〈SWITCH〉中有句歌詞特別搶眼，就是「呢首歌有骨」，JACE笑指：「有骨呀！你小心哽親呀提提你！無論音樂類型的我嘅歌詞，佢都要你消化吓，唔容易食，要小心啲聽留意多啲，好直。」
近一兩年，JACE更坦誠地在音樂上表達自己，分水嶺在成為獨立歌手後：「我覺得獨立係好大嘅轉捩點，我好多謝呢個轉捩點。其實以前都直率，但就會有人同我講：『唔夠保護自己喎、冇著數喎』但我有咗自由度，我第一次坦白嘅嘗試就係專輯《Hatching》，都係我坦白挑戰小成功，有自己特色，大家都接受到，畀咗個強心針我。」
常被批「做埋晒啲咁嘅歌冇人聽囉」
今次MV其中一個蛇頭CGI，被網民指似《火影忍者》角色大蛇丸，雖然有反對聲音，但同時間都有很多人留言，感謝她敢行出來挑戰，JACE：「我睇上去好有信心，但其實呢份信心要互相畀。如果大家覺得，你唔可以咁樣著衫、你唔可以咁樣講嘢，我就畀信心你，你可以！你哋覺得唔可以，我覺得可以，因為我衝咗出嚟做。點解香港國際大都會，著條褲短啲又驚畀人望，講嘢大聲啲又畀人話嘈，講嘢勇敢啲又驚網上有人鬧，但大家唔理嗰啲負能量，勇敢多啲，可能會見到更多正面能量。」
劍走偏鋒必有負評，她怎會不知道？「啲人話『做埋晒啲咁嘅歌冇人聽囉』！有好多㗎！佢數字上一定唔係最多人聽，但我對你的有信心，你哋對我有信心，所以我繼續做。」
膽粗粗入紙紅館竟成真
上年JACE在頒獎台上高調宣布將殺入紅館，「紅館」兩個字，對她而言又意味著甚麼？「紅館對我嚟講係大家嘅期許，係一班人去成就一件事嘅一個里程碑，佢有少少壓力成分但都有挑戰。挑戰在於大家都覺得你要做呢件事，咁點樣變得好玩，又能夠勝任？呢個意義都複雜，我都諗緊，可能有少少逃避緊！唔好諗太多都係一個求生本能，我就係容易諗太多。」那當初總有入紙一刻，當時在想甚麼？她幽默地道：「試下囉！聽人哋講好難入，哈哈！做到咪做囉，點知又做到喎！」
被關注不感壓力：好彩唔係咩奇怪緋聞被人影到！
對於早前有人指她「壓榨」MV工作人員，要人直踩37個半鐘開工，後來揭發是一場誤會，JACE：「我覺得冇委屈嘅，你明別明，唔明咪唔明，每個人咁多嘢要理，（新聞）轉個頭就唔記得咗啦！」對於周不時都會上新聞受關注，她就表示不感壓力，甚至可能是好事：「我入行以嚟唔算好多新聞，好彩唔係咩奇怪緋聞被人影到！唔係嗰啲啦！但幸運地都有好多關注，我都冇覺得咩壓力、唔怕講。我傾向諗係好事，音樂未必大家都有興趣，但由唔同角度大家都理解到我，冇誤會偏頗，我都接受得到。 」
見JACE當天訪問排得密麻麻，而且連踩幾日，但眼前就只有她本人與一位經理人，兩個人同時處理千百樣事情，JACE笑言她每一天起床都會問自己：點解要自己做咁多嘢？「每一日起身我都問緊！我做〈百妖夜行的修行〉好強烈，做咩要做咁複雜嘅歌呢？ 呢啲歌又唔係多人聽，又唔係賺多啲錢。而家搞紅館，我又會問點解要自己搞紅館呢？明明人哋就搵人幫，點解要自己搞呢？點解！我每一日都問緊，但我揀咗喇，因為鍾意攞苦嚟辛，因為人係要試、要學習、要進步。」這兩年她行得比別人快、進步得比別人多，原來有時「攞苦嚟辛」，也是一場值得嘗試的冒險。
採訪：何德
Hair: Kenki Lau @kenki_getdown
Makeup: Echo Makeup @echo_makeup
Wardrobe: YAT PIT @yat_pit
Venue: Regent Hong Kong @hongkongregent
