「Yahoo搜尋人氣大獎2018」今晚隆重舉行 張敬軒佘詩曼率先奪人氣男女偶像奬

踏入年尾，又係派成績表嘅時間啦！香港網絡界最強指標性嘅頒獎禮「Yahoo搜尋人氣大獎2018」頒獎典禮喺今晚8點15分就會隆重舉行。

噚日率先公佈幾個由廣大市民及網民有份投票嘅四大人氣獎項「香港人氣男偶像」、「香港人氣女偶像」、「香港人氣組合」及「亞洲人氣偶像」嘅得獎名單。張敬軒早前喺個人社交平台呼籲網民投票，得多網民熱烈支持，成功奪「香港人氣男偶像」；憑《延禧攻略》飾演奸角「嫻妃」獲網民熱捧嘅佘詩曼就奪得「香港人氣女偶像」。

至於「香港人氣組合」方面，投票戰況激烈，最終由回歸樂壇嘅BOYZ奪得。而内地歌手華晨宇人氣強勁，成為「亞洲人氣票王」。

一如往年，頒獎典禮將會有中港韓台巨星雲集，令會場星光熠熠。出席藝人除咗一班本地藝人，包括古天樂、林峯、吳鎮宇、張敬軒、謝安琪（Kay）、麥浚龍（Juno）、陳柏宇、MIRROR、陳家樂、馬德鐘、李佳芯、胡定欣、陳煒、黃心穎等等。另外，憑韓劇《我的ID是江南美人》而人氣急升嘅韓團ASTRO成員車銀優都會現身。

古天樂復出樂壇，與謝安琪合唱歌曲《（一個男人）一個女人和浴室》引起網民熱烈討論，人氣急升。早前成功入圍叱咤樂壇嘅「我最喜愛的男歌手」最後5強，硬撼陳奕迅、陳柏宇、周國賢及張敬軒。今晚古仔、Kay同Juno都會出席，唔知到時有冇機會推到佢唱Live呢？

大家除咗可以以先到先得形式免費入場之外，Yahoo TV https://hk.video.yahoo.com/ 亦將全程網上直播整個頒獎禮，見證各個獎項誕生。